Stefna á gervigreindarver við Húsa­vík

Þetta kemur fram í tilkynningu frá sveitarfélaginu, en þar segir að um sé að ræða fyrsta fasta gervigreindarvers á 4,3 hektara lóð með 50 MW raforkuþörf.

Umrætt félag, GIGA-42, mun síðan þurfa að semja við Landsvirkjun um afhendingu rafmagns við verkefnisins.

Bergþór Bjarnason, staðgengill sveitarstjóra Norðurþings og William Tasney forstjóri GIGA-42 undirrituðu viljayfirlýsinguna á Húsavík í morgun.

„Það eru stækkunarmöguleikar á verkefninu fáist meiri orka enda ljóst að eftirspurn eftir reikniafli ofurtölva og gagnageymslu mun aukast á næstu árum með auknum notum gervigreindar í samfélaginu. Miðað er við að framkvæmdir hefjist á fyrri hluta árs 2026 og áætlað að um 100 einstaklingar komi að byggingu versins, hönnun og skipulagi framkvæmda,“ segir í tilkynningunni.

Þá segir að eftir uppbyggingu þessa fyrsta fasa verði lokið verði gert ráð fyrir um fimmtíu til áttatíu varanlegum störfum. Þau störf verði á tæknisviði, og er talið upp að þarna muni starfa fólk við rafmagnsverkfræði, rafvirkjun, vélaverkfræði, kælitækni auk verkstjórnar, rekstrartækni, kerfisfræði og almennra starfa.

„Um er að ræða rekstur allan sólarhringinn allan ársins hring,“ segir í tilkynningunni.

„Ísland getur orðið miðpunktur gervigreindarlausna. Kostir uppbyggingar gagnavers á Bakka er nálægð við spennivirki frá Þeistareykjum og þegar skipulagt iðnaðarsvæði. Samfélagið á Húsavík er sterkt og sveitarstjórn er með skýra sýn á iðnaðaruppbyggingu í Norðurþingi og á iðnaðarsvæðinu á Bakka. Afleiða frá gagnaverinu er glatvarmi sem getur nýst við frekari uppbyggingu á svæðinu, t.d. fyrir fiskeldi, gróðurhús eða aðra matvælastarfsemi.“