Skattakóngurinn flytur úr landi

Samkvæmt nýútkomnu Tekjublaði Frjálsrar verslunar var Árni tekjuhæsti Íslendingurinn í fyrra með rúmlega fjörutíu milljónir króna í tekjur á mánuði. Rétt er að árétta að þar er um allar útsvarsskyldar tekjur að ræða og þær þurfa ekki að endurspegla föst laun Árna. 

Þá má nefna að fjármagnstekjuskattur er tekinn út fyrir sviga í samantekt Frjálsrar verslunar og því er ekki loku fyrir það skotið að einhver annar en Árni hafi lagt mest til samneyslunnar í fyrra.

Marel hf. sameinaðist John Bean Technologies Corporation á árinu en risasamruni félaganna kláraðist formlega í byrjun þessa árs. Árni var ráðinn aðstoðarforstjóri sameinaðs félags og hlaut bónusgreiðslur upp á um 330 milljónir króna við það tilefni, að því er segir í umfjöllun Innherja. Þá hlaut hann veglegar árangurstengdar greiðslur vegna síðasta árs og rekja má drjúgan hluta tekna hans í fyrra til þeirra.

Líka af persónulegum ástæðum

Það mun ekki væsa um Árna hjá sameinuðu félagi enda verður hann með 750 þúsund Bandaríkjadali, um 93 milljónir króna, á ári í grunnlaun auk möguleika á ríkulegum árangurstengdum greiðslum. Því gæti tölvubréf sem hann sendi samstarfsfólki sínu í lok júlí orðið þeim sem halda á pyngju ríkisins örlítið áhyggjuefni. Hann ætlar nefnilega að flytja úr landi.

Í bréfinu, sem ritað er á ensku, segir hann að hann og fjölskylda hans hafi ákveðið að flytja til Chicago í Bandaríkjunum, að vel ígrunduðu máli.

„Þetta er skref sem við höfum ákveðið að taka saman, með hag fjölskyldunnar fyrir brjósti og vegna nýrra tækifæra, bæði persónulega og í starfi. Ísland verður ávallt heimili okkar.“

Verður ekki langt undan

Þá segir Árni að á sama tíma og fjölskyldan hlakki til þessa næsta kafla muni hann þó halda áfram að verja talsverðum tíma á Íslandi, koma reglulega í heimsókn til að vera með í áframhaldandi þróun félagsins á Íslandi. Þá verði hann í nánu sambandi við íslenska hluthafa í félaginu, sem hann muni funda með á hverjum ársfjórðungi.

„Þessir búferlaflutningar veita mér gott tækifæri til að öðlast dýpri skilning á hinu rótgróna JBT. Að kynnast hvert öðru, þvert á nýlega sameinað félag, er nauðsynlegt vel heppnuðum samruna. Ég hlakka mikið til að verja tíma á starfsstöðvum okkar um allan heim, að hitta nýja samstarfsmenn og að styrkja sambönd þvert á félagið.“

Þá ítrekar hann að flutningarnir muni ekki hafa áhrif á það hversu auðvelt sé að ná í hann, dyr hans standi áfram opnar og samstarfsfólk megi búast við áframhaldandi góðum samskiptum og samstarfi.

Árni baðst undan viðtali vegna flutninganna