Skildirnir hafi hótað konum sem setji út á þá

Umræddur félagsskapur, sem kallar sig Skjöld Íslands, hefur vakið athygli undanfarna daga. Þeir segja markmið sitt að spyrna við andvaraleysi stjórnvalda varðandi hælisleitendur leigubílamarkaðinn hér á landi.

Greint hefur verið frá því sumir meðlimir hópsins hafi hlotið fangelsisdóma, meðal annars fyrir gróf ofbeldisbrot. Í yfirlýsingu hafa þeir þó talað um að hafa snúið við blaðinu og tileinkað sér betri lifnaðarhætti.

Sjá nánar: Segjast komnir með nóg og ætla að gæta að fram­tíð Ís­lands

„Ég ætla ekkert að efast um það að þessir menn vilji gera vel, gangi á Guðs vegum og afneiti djöflinum og öllu slíku, en það er auðvitað áhyggjuefni ef einhverjir telja sig geta tekið lögin eigin hendur. Það eru fjölmörg dæmi um að það endar ekki nema illa,“ sagði Fjölnir í Reykjavík síðdegis í dag.

Hann leggur til að umræddir menn fari aðrar leiðir vilji þeir hjálpa lögreglunni og samfélaginu í heild.

„Þessir góðu menn, ef þeir vilja gera samfélaginu gagn þá geta þeir gert það á ýmsan annan hátt. Þeir geta gengið í sjálfboðaliðasamtök, og ef þeir vilja hjálpa lögreglunni þá búa þeir eflaust yfir upplýsingum um undirheima Íslands sem þeir gætu komið á framfæri.“

Þá segist Fjölnir hafa fengið upplýsingar um að einhverjir þeirra hafi hótað fólki sem gagnrýni þá.

„Mér voru að berast upplýsingar um það að þeir eru kannski ekki allir komnir jafnlangt á sinni braut. Þeir hafa verið að hóta fólki sem setur út á þá á netinu. Einhverjir þeirra eru greinilega ekki alveg klárir í sínum nýja lífstíl og vilja þagga niður í konum sem gagnrýna þá, segja að það eigi að „þagga niður í þeim endanlega“. Ég held að þeir þurfi aðeins að skoða hópinn.“

Fjölnir segir fullyrðingar um að glæpir séu að aukast hér á landi hreinlega ekki réttar. Þá tekur hann fram að það séu einstaklingar sem fremji afbrot, en ekki þjóðfélagshópar. Fjölnir tekur sem dæmi að sjálfur vilji hann ekki að honum verði kennt um brot sem aðrir karlmenn fremji.

Hann tekur fram að mögulega megi túlka tilkomu þessa hóps sem ákall til lögreglu um að sinna ákveðnum verkefnum betur. Það sé þó í höndum lögreglunnar að meta og forgangsraða málum.

„Ég skil ekki alveg hvernig þeir ætla að hjálpa. Því ef ég skil rétt hafi snúið baki við öllu ofbeldi. Kannski bara með nærveru sinni, ég veit það ekki?“

Merki Skjaldar Íslands, hin svokallaði járnkross, hefur vakið athygli. 

Hópurinn fyrirbýður sér allar tengingar við nýnasisma, en bent hefur verið á að járnkrossin hafi til að mynda verið á forsíðu stefnuyfirlýsingar Anders Behring Breivik, hryðjuverkamannsins og nýnasistans sem myrti 77 manns í Ósló og Útey fyrir nákvæmlega fjórtán árum.

Það að þeir séu merktir einhverjum járnkrossi, eigum við að leggja einhverja merkingu í það?

„Verðum við ekki að gera það? Þeir hefðu getað valið sér kristnari kross ef þeir vilja vera með kristin skilaboð,“ segir Fjölnir.