Innlent

Reyna að stilla til friðar í bakherbergjum Al­þingis

Agnar Már Másson skrifar
Kristrún Forstadóttir, formaður Samfylkingarinnar og nú forsætisráðherra, og Guðrún Hafsteinsdóttir, formaður Sjálfstæðisflokksins, standa í dyragættinni að þingsalnum árið 2024. Kristrún var þá þingmaður í minnihluta en Guðrún ráðherra í ríkisstjórn. Nú er staðan breytt.
Kristrún Forstadóttir, formaður Samfylkingarinnar og nú forsætisráðherra, og Guðrún Hafsteinsdóttir, formaður Sjálfstæðisflokksins, standa í dyragættinni að þingsalnum árið 2024. Kristrún var þá þingmaður í minnihluta en Guðrún ráðherra í ríkisstjórn. Nú er staðan breytt. Vísir/Vilhelm

Formenn stjórnmálaflokka á Alþingi sitja nú fund vegna þráteflisins sem myndast hefur í umræðu um veiðigjöldin á Alþingi. Mikill hiti hefur verið í þingmönnum í dag.

Fundur flokksformanna hófst klukkan 17 en í framhaldi af honum munu þingflokksmenn funda klukkan 19.30 að sögn Bergþórs Ólasonar, þingflokksformanns Miðflokksins.

Mikill hiti hefur verið á þingfundi dagsins, sem hófst á óvæntu ávarpi forsætisráðherra í morgun.

Ásakanir hafa flogið fram og til baka milli stjórnar og stjórnarandstöðu en ákvörðun Hildar Sverrisdóttur um að slíta þingfundi klukkan 23.39 í gærkvöldi í óþökk forseta Alþingis hefur ekki fallið vel í kramið hjá stjórnarliðum.

Guðmundur Ingi Kristinsson menntamálaráðherra hefur meðal annars sakað sjálfstæðismanninn um valdarán, ásakanir sem Hildur kallar „alvarlegar“ og „ógeðfelldar“.

Prófessor emeritus í stjórnmálafræði sagði í dag að formenn ríkisstjórnarflokkanna hefðu í ræðustól hótað því undir rós að beita hugsanlega hinni umtöluðu 71. grein þingskapalaga til þess að stöðva eða afmarka ræður minnihlutans um málið og koma því í atkvæðagreiðslu en greininni hefur ekki verið beitt síðan 1959.

Hlé var gert á þingfunndi um 17 og á hann að hfejast á ný klukkan 18 en fundarhlé hefur á síðustu dögum oft verið framlengt vegna funda formanna eða þingflokksformanna.




Fleiri fréttir

Sjá meira


×