Tveir hand­teknir eftir hús­leit í Laugar­dal og Kópa­vogi

Málið teygir anga sína alla leið til Raufarhafnar, þar sem lögreglan rannsakar nú skipulagða glæpastarfsemi og fíkniefnaframleiðslu.

Lögreglan á Norðurlandi eystra greinir frá í tilkynningu að hún hafi ráðist í tvenna húsleit í gær, annars vegar í Laugardal í Reykjavík og hins vegar í Kópavogi. 

Lögregla segir að tveir hafi verið handteknir í aðgerðum gærdagsins. Alls eru fimm manns nú í gæsluvarðhaldi og í dag verður lagt mat á hvort farið verði fram á gæsluvarðhald yfir þeim sjötta, að sögn lögreglu.

Með þessu hefur lögreglan ráðist í sex húsleitaraðgerði í tengslum við málið. 

Fyrstu aðgerðir í málinu voru þann 18. júní síðastliðinn en þá var ráðist í húsleit á þremur stöðum, að sögn lögreglu. Þann dag var ráðist í húsleit á Aðalbraut 37 á Raufarhöfn og Þórólfsgötu 5 í Borgarnesi, auk annars húss á höfuðborgarsvæðinu staðsetning hvers liggur ekki fyrir.

Síðan þá hefur verið ráðist í húsleit á þremur stöðum til viðbótar, þar með talin aðgerð gærdagsins við Austurbrún 21 í Laugardal, eins og fram kom í umfjöllun Vísis í gær. Lögreglan hefur að öðru leyti lítið tjáð sig um málið. 

Fréttin hefur verið uppfærð.