Boston Celtics losar sig við annan lykil­mann úr meistara­liðinu

Forráðamenn Celtics hafa samþykkt að láta Kristaps Porzingis fara til Atlanta Hawks en Brooklyn Nets tekur einnig þátt í skiptunum.

Celtics fær Georges Niang og valrétt í annarri umferð, Terance Mann og 22. valréttur Hawks er á leiðinni til Brooklyn og svo fer Porzingis og valréttur úr annarri umferð til Atlanta.

Daginn áður hafði Boston sent Jrue Holiday til Portland Trail Blazers í skiptum fyrir Anfernee Simons og tvo valrétti.

Bobby Marks, launaþakssérfræðingur ESPN, hefur reiknað það út að með öllum þessum leikmannaskiptum þá sparar Boston Celtics sér að borga 180 milljónir dollara í lúxusskatt eða 22 milljarða íslenskra króna. Sparnaðurinn gæti reyndar endað með að vera meira en 250 milljónir dollara eða meira en þrjátíu milljarðar íslenskra króna. 

Þetta eru aðhaldsaðgerðir sem tengjast því örugglega að stórstjarnan Jayson Tatum sleit hásin í úrslitakeppninni og missir væntanlega af öllu næsta tímabili.

Eigendur Boston liðsins eru líka að ganga frá sölunni á félaginu og þá er betra ef fjárhagsstaðan líti betur út.

Porzingis átti tvö góð tímabil í Boston en hann hitti úr 41 prósent þriggja stiga skota sinna og skoraði 19 stig í leik. Hann glímdi þó við einhver veikindi á lokakafla tímabilsins en ætti að vera búinn að ná sér af þeim.