Gátu loks yfir­heyrt konuna

Þetta segir Ævar Pálmi Pálmason, aðstoðaryfirlögregluþjónn miðlægrar rannsóknardeildar Lögreglunnar á höfuðborgarsvæðinu, í samtali við Vísi. Hann segist ekkert geta gefið upp um það sem kom fram í yfirheyrslunni, hvorki hvort konan hefði játað verknaðinn eða hvernig ástand hennar hefði verið í yfirheyrslunni.

Hann segir að ástand hennar sé stöðugt en hún hefur legið á sjúkrahúsi með stunguáverka síðan á laugardagsmorgun, þegar eiginmaður hennar og dóttir fundust látin á hótelherbergi á Edition-hótelinu í Reykjavík. Konan og maður hennar voru á sextugsaldri en dóttirin um þrítugt.

Rannsókn miðar vel

Ævar Pálmi segir að rannsókn málsins miði vel en henni sé hvergi nærri lokið. Vettvangsrannsókn standi enn yfir og hótelherbergið sé enn innsiglað. Ekki hafi verið talin þörf á víðtækari lokunum á hótelinu. Hann kveðst ekki vita hvort gist sé í nærliggjandi herbergjum eða ekki. Það sé alfarið undir stjórnendum hótelsins komið.

Í vikunni var greint frá því lögreglumenn hefðu sett sig í samband við kollega sína í Frakklandi. Ævar Pálmi sagði það hafa verið gert með fulltingi franska sendiráðsins á Íslandi. Franska lögreglan hefði aðstoðað þá íslensku við að komast í samband við aðstandendur þeirra látnu. Hin látnu og konan sem grunuð er um að hafa ráðið þeim bana, hefðu þó verið búsett á Írlandi og komið þaðan til landsins.

Ævar segir að lögreglan sé enn í virki samtali og samstarfi við erlend löggæsluyfirvöld, bæði frönsk og írsk. Ekki hafi komið til tals að erlendir lögreglumenn komi til landsins. Lögregla búi ekki yfir upplýsingum um að fólkið hafi áður komið við sögu hjá þessum löggæsluyfirvöldum.

Ekki ákveðið hvort farið verði fram á gæsluvarðhald

Konan var úrskurðuð í gæsluvarðhald á grundvelli rannsóknarhagsmuna á laugardag en úrskurður sá rennur að óbreyttu út á morgun. Ævar Pálmi segir ákvörðun verða tekna á morgun um það hvort farið verði fram á áfranhaldandi gæsluvarðhald yfir konunni. Hann telji það þó ekki ólíklegt og það yrði gert á grundvelli rannsóknarhagsmuna.