Knicks horfir til Dallas í leit að næsta þjálfara

Knicks komst alla leið í úrslit í austurhluta NBA-deildarinnar í ár en mátti þar þola tap gegn Indiana Pacers líkt og í úrslitakeppninni á síðasta ári. Í kjölfarið ákvað Knicks að láta hinn 67 ára gamla Tom fara. Hann hafði stýrt liðinu frá árinu 2020.

Þó svo að síðustu tvö ár hafi verið virkilega góð eftir mögur ár þar á undan var talið að Tom væri kominn á endastöð og nú þarf Knicks að finna þjálfara sem getur komið liðinu enn lengra.

The Athletic greinir frá því að Knicks hafi trú á að Kidd, sem endaði leikmannaferil sinn með liðinu, sé sá maður. Hann hefur verið þjálfari Dallas Mavericks frá 2021 og hefur gengið í gegnum ýmislegt þar á bæ.

Á yfirstandandi tímabili var Luka Dončić óvænt skipt til Los Angeles Lakers og gufuðu draumar Dallas um meistaratitil upp fljótlega eftir það vegna ýmissa ástæðna sem nær ómögulegt er að kenna þjálfara liðsins um. Gríðarleg meiðsli herjuðu á liðið og náði Kidd aldrei að stilla upp sínu besta liði eftir að Dončić yfirgaf félagið.

Kidd hefur þjálfað í NBA-deildinni í meira en áratug. Hann hóf ferilinn hjá Brooklyn Nets, þaðan lá leiðin til Milwaukee Bucks og svo var hann aðstoðarþjálfari Lakers frá 2019-21 áður en hann tók við Dallas.

Þar sem Kidd er samningsbundinn Mavericks þarf Knicks að biðja um leyfi til að ræða við þjálfarann. The Athletic telur hins vegar ólíklegt að Dallas samþykki þá beiðni.