Þjóðhátíð um raunveruleikaþátt Brynjars: „Það er ekkert í boði“

Rafn Ágúst Ragnarsson skrifar 7. júní 2025 13:14

Ljóst er að sigurvegari Leitinnar að Club troði ekki upp í Herjólfsdal. Vísir/Viktor

Raftónlistartvíeykið ClubDub kemur ekki fram á þjóðhátíð í Vestmannaeyjum eins og til stóð. Eftir brotthvarf annars meðlimsins hafði hinn uppi háleitar hugmyndir um að finna arftaka hans í raunveruleikaþætti sem fengi að koma með undir nafni sveitarinnar á þjóðhátíð en nú er ljóst að ekkert verði af því. Formaður þjóðhátíðarnefndar segir forsendur samningsins við sveitina brostnar.

Brynjar Barkarson, annar helmingur ClubDub, ræddi við fréttastofu á fimmtudaginn um áætlanir sínar um að fara af stað með raunveruleikaþátt þar sem sigurvegarinn yrði arftaki Arons Kristins Jónassonar í sveitinni. Líkt og fjallað hefur verið um undanfarið sagði Aron Kristinn skilið við sveitina eftir að Brynjar hóf að láta til sín taka á nýju sviði.

Múslimar blóðsugur sem beri ábyrgð á vistarbandinu

Nefnilega á sviði umræðu um hælisleitendamál en hann hefur farið mikinn á ýmsum vettvangi og látið hafa eftir sér að múslimar séu blóðsugur sem bæru meðal annars ábyrgð á vistarbandinu og daðraði við hinar ýmsu samsæriskenningar.

Brynjar greindi frá því í samtali við fréttastofu að hann ætlaði ekki að leyfa brotthvarfi Arons Kristins að marka endalok sveitarinnar. Hann segist ætla að framleiða raunveruleikaþátt þar sem umsækjendur keppa um að fylla í skarðið í sveitinni. Takist einum heppnum að heilla hann upp úr skónum fær hann að taka lagið á stærsta sviði landsins.

Þegar blaðamaður lagði fyrir hann hvort hann hefði borið þetta allt saman undir Aron Kristinn svaraði Brynjar á þann veg að Aron væri „bara að vinna í sínu.“ Fréttastofa hefur reynt að ná í Aron Kristinn en án árangurs.

Ekki í boði að skipta Aroni út

Jónas Guðbjörn Jónsson, formaður þjóðhátíðarnefndar ÍBV, segir forsendur þess að ClubDub komi fram í Herjólfsdal algjörlega brostnar.

„Annar aðilinn hætti í hljómsveitinni í byrjun vikunnar. Við settum okkur í samband við þá báða. Forsendurnar fyrir samningnum eru brostnar,“ segir hann.

Blaðamaður bar undir hann fyrirætlanir Brynjars um að fylla í skarð Arons Kristins í raunveruleikaþáttum.

„Nei, það er ekkert í boði. Forsendurnar eru alveg brostnar þegar Aron segir sig úr þessu. Við ætlum bara að finna einhvern annan í staðinn.“

Þjóðhátíð í Eyjum Tónlist