Felldu til­lögu um að olíu­sjóðurinn snið­gengi fyrir­tæki á her­numdu svæðunum

Stuðningsfólk Palestínumanna hefur þrýst á minnihlutastjórn Verkamannaflokksins í Noregi að fyrirskipa þjóðarsjóðnum að draga sig út úr öllum fyrirtækjum sem tengast Vesturbakkanum og Gasaströndinni undanfarna mánuði. Það hefur ríkisstjórnin ekki viljað gera.

„VIð seljum okkur frá fyrirtækjum sem eiga þátt í brotum Ísraels á alþjóðalögum en við seljum okkur ekki frá öllum fyrirtækjum sem eru á staðnum,“ sagði Jens Stoltenberg, fjármálaráðherra, við umræður á þingi, að því er kemur fram í frétt Reuters-fréttastofunnar.

Sérstakur sendifulltrúi Sameinuðu þjóðanna vegna mannréttindamála á landsvæðum Palestínumanna hafði ritað Stoltenberg bréf þar sem hann benti á að ísraelsk fyrirtæki væru hluti af hernáminu á Vesturbakkanum og Gasaströndinni og ofbeldinu sem því fylgdi. 

Stoltenberg svaraði að hann væri viss um að fjárfestingar olíusjóðsins samræmdust skyldum Noregs samkvæmt alþjóðalögum. Vísaði hann til þess að óháð eftirlitsstofnun framfylgdi siðareglum fyrir sjóðinn sem norska þingið setti honum.

Þessi eftirlitsstofnun hefur á undanförnum mánuðum mælt með því að sjóðurinn seldi hluti sína í ísraelsku bensínstöðvakeðjunni Paz og fjarskiptafyrirtækinu Bezq. Hún hefur til skoðunar að útiloka fleiri ísraelsk fyrirtæki.