Vannærð börn svelti eða verði læknanlegum sjúk­dómum að bráð

Þrýstingur á að Ísrael hleypi hjálparstofnunum inn á Gasa með mat og mannúðaraðstoð fer vaxandi, en ástandið á svæðinu er afar slæmt. Stór hluti íbúa er háður þeirri litlu aðstoð sem fæst. Fjöldi fólks kom saman við góðgerðareldhús í Gasaborg í gær í von um að fá úthlutað heitum mat. Í þessu eldhúsi sem og fleirum á Gasasvæðinu eru þó færri sem hafa fengið en viljað síðustu daga og vikur þar sem matur, lyf og aðrar nauðsynjar eru víða af skornum skammti og örvæntingin alltumlykjandi.

Stór hluti þeirra tveggja milljóna sem búa á gasa hefur að undanförnu þurft að treysta á mannúðaraðstoð. Ísraelsk stjórnvöld sem halda Gasa í herkví eru nú undir auknum alþjóðlegum þrýstingi að greiða götu þeirra sem geti farið með vistir og hjálpargögn inn á svæðið. Stjórnvöld í Bandaríkjunum sem eru helsti bandamaður Ísraela hafa til að mynda kallað eftir slíkum aðgerðum.

Í gær hleyptu Ísraelar fleiri en hundrað sendiferðabílum inn á svæðið en talsmenn SÞ segja að minsnt 600 bílar þurfa að fara inn á svæðið á degi hverjum svo hægt sé að mæta ástandinu. Auk þess sem upplausnarástandð á Gasa hafi orðið til þess að erfitt sé að dreifa hjálpargögnum sem rati í auknum mæli ekki á áfangastað.

Örfáir trukkar fyrir milljónir manna

„Við höfum gríðarlega miklar áhyggjur. Við höfum ógnarmagn af birgðum hinum megin við landamærin sem við bíðum eftir að geta komið inn á svæðið en enn sem komið er eru þetta bara örfáir trukkar sem hafa komist inn á svæðið til að mæta þörfum tveggja milljóna manna,“ segir Birna Þórarinsdóttir, framkvæmdastjóri UNICEF á Íslandi.

Hún segir að Ísraelum, sem hernámsaðilum á svæðinu, beri lagaleg skylda að tryggja aðgengi mannúðargagna.

„Ég skil ekki hvernig svona ástand getur í fyrsta lagi fengið að verða og svo fengið að vara svona lengi. Það eru bráðum þrír mánuðir síðan það var lokað fyrir aðgengi hjálpargagna inn á svæðið. Allar mannúðarstofnanir eru að tala óskaplega skýrt og strangt og við sjáum fleiri ríkisstjórnir taka undir en ástandið er því sem næst óbreytt,“ segir Birna.

Hvað fær að fara inn á svæðið?

„Þetta er rétt öðru hvoru megin við hundrað bíla sem fengið hafa að fara inn á allra síðustu dögum þegar það er áætlað að það þyrfti svona fimm til sex hundruð bíla á dag til að mæta þörfinni. Það sem hefur fengið að fara inn er hveiti, þannig að fyrstu bakaríin hófu starfsemi aftur. Lækningavörur og svo eitthvað af næringu fyrir ungabörn, svona formúlu. Svo er svo margt sem fær ekki að fara inn, eiginlega flest fær ekki að fara inn og þar á meðal gas til að elda mat, tjöld. Fólk hefst við í rústum og við megum ekki fara inn með tjöld á svæðið,“ segir hún.

Vannærð börn deyi úr læknanlegum sjúkdómum

Útbreidd vannæring meðal barnshafandi kvenna valdi því að börn fæðist langt fyrir tímann. Nóg sé til af hitakössum, Ísraelsmegin við landamærin. Þeir fá ekki að fara inn.

„Ástandið er þannig að börn og fullorðnir eru að deyja úr hungri. Það er mikill vatnsskortur líka. Það hafa engar birgðir komist til Norður-Gasa og vannærð börn eru mjög veik fyrir öðrum sjúkdómum. Að óbreyttu munu fleiri börn deyja úr hungri og læknanlegum sjúkdómum en þyrftu að gera,“ segir Birna Þórarinsdóttir, framkvæmdastjóri UNICEF á Íslandi.