Stóra stundin hjá þeim Rebekku og Ás­geiri

Þau hafa verið saman í níu ár, trúlofuðust á gamlárskvöld fyrir tveimur árum og skipulagning tæplega 100 manna brúðkaups hefur staðið yfir. Þau eru bæði 25 ára og búa í Breiðholti ásamt hundunum sínum tveimur, Nölu og Tinnu. Ásgeir starfar sem vélvirki hjá Orku náttúrunnar og Rebekka sem félagsliði í dagþjónustu fyrir fötluð og langveik börn.

Í síðasta þætti af Stóra stundin á Stöð 2 fékk Sigrún Ósk að fylgjast með þegar þau gengu í það heilaga þann 8. mars síðastliðinn.

Þau Rebekka og Ásgeir gerðu sér grein fyrir því að á þeim árstíma gæti verið allra veðra von. En viku fyrir brúðkaup var aftakaveður og næstu daga gekk á með gulum og appelsínugulum viðvörunum á víxl. En allt blessaðist þetta og hér að neðan má sjá stóru stundina hjá þeim hjónum. Þættirnir Stóra stundin er á dagskrá á Stöð 2 á sunnudagskvöldum.