Þetta kemur fram í tilkynningu til Kauphallarinnar. Þar segir að aðalfundur Ísfélags hf. hafi verið haldinn að Tangagötu 1 í Vestmannaeyjum og rafrænt í dag. Mætt var fyrir 87,14 prósent atkvæða.
Ársreikningur félagsins var samþykktur á fundinum, tillaga um greiðslu arðs og tillaga um starfskjarastefnu. Samþykkt var að arðgreiðsla verði 2,558 kr. á hlut eða 2,1 milljarður króna sem greiðist út 16. maí 2025.
Aðalfundur samþykkti einnig að framlengja heimild stjórn félagsins til að kaupa eigin hluti í félaginu til næstu átján mánaða.
Kosið í stjórnir
Þá var kosið í stjórn félagsins en kosin voru Guðbjörg Matthíasdóttir, Einar Sigurðsson, Gunnar Sigvaldason, Steinunn H. Marteinsdóttir og Sigríður Vala Halldórsdóttir.
Stjórnin kom saman í kjölfar aðalfundar og hefur skipt með sér verkum, Einar Sigurðsson verður stjórnarformaður og Steinunn H. Marteinsdóttir varaformaður stjórnar.
Á aðalfundinum var einnig samþykkt tillaga stjórnar um tilnefningu nefndarmanna í endurskoðunarnefnd. Tilnefndir voru Gunnar Svavarsson og Lárus Finnbogason sem verður formaður nefndarinnar. Báðir eru óháðir félaginu samkvæmt tilkynningunni.
Þóknanir til stjórnarmanna
Þá voru samþykktar ákvarðanir um þóknun til stjórnar félagsins og þóknun til endurskoðunarnefndar fyrir árið 2024.
Samþykkt var að stjórnarformaður verði með 517.500 krónur á mánuði en aðrir stjórnarmenn með 258.750. Þá var samþykkt að formaður endurskoðunarnefndar verði með 269.100 krónur á mánuði en aðrir stjórnarmenn endurskoðunarnefndar með 134.550 krónur.
Þá samþykkti fundurinn að endurskoðandi félagsins fyrir næsta ár verði Matthías Þ. Óskarsson hjá KPMG.
