Ást­björn missir af næstu leikjum KR

KR og Valur gerðu 3-3 jafntefli í einum ef ekki skemmtilegasta leik sumarsins til þessa í 2. umferð Bestu deildar karla í knattspyrnu. Ástbjörn sem og Finnur Tómas Pálmason, fyrirliði KR í fjarveru Arons Sigurðssonar, fóru meiddir af velli í leiknum.

Í viðtali við Fótbolti.net eftir 11-0 bikarsigur á KÁ staðfesti Óskar Hrafn Þorvaldsson að Ástbjörn yrði eitthvað frá vegna meiðslanna sem hann varð fyrir á ökkla þegar Tryggvi Hrafn Haraldsson tæklaði hann illa.

„Við skoðum Finn (Tómas) bara dag frá degi. Hann fékk högg á hnéð og meiddist á öxl,“ sagði Óskar Hrafn um einn miðvarða sinna og óvíst hvort hann verði með gegn FH á miðvikudag.

Jákvæðu fréttirnar fyrir KR eru þær að miðvörðurinn Birgir Steinn Styrmisson spilaði fyrri hálfleikinn gegn KÁ og Matthias Præst kom inn af bekknum á 55. mínútum en Daninn hefur ekki enn leikið með liðinu í deildinni.

Gyrðir Hrafn Guðbrandsson kom einnig inn af bekknum en hann fór einnig af velli gegn Val sem leiddi til þess að Atli Sigurjónsson og Gabríel Hrannar Eyjólfsson enduðu leikinn sem miðverðir. Stöðu sem hvorugur hefur eflaust spilað áður.

Þá er bakvörðurinn Hjalti Sigurðsson búinn að taka út leikbann eftir að fá tvö gul gegn KA í 1. umferð og gæti því stigið inn fyrir Ástbjörn þegar KR heimsækir FH í Kaplakrika í 3. umferð Bestu deildarinnar.

Leikurinn hefst klukkan 18.00 á miðvikudaginn kemur, 23. apríl, og verður sýndur beint á rás Bestu deildarinnar. Bæði lið eru í leit að sínum fyrsta deildarsigri.