„Við skulum að­eins róa okkur, fókus“

Í Pallborðinu á Vísi, undir stjórn Berghildar Erlu Bernharðsdóttur fréttamanns, mættu Líf Magneudóttir, VG, og Helga Þórðardóttir, Flokki fólksins, fyrir hönd meirihlutans þeim Hildi Björnsdóttur, Sjálfstæðisflokki, og Einari Þorsteinssyni, Framsókn. Farið var um víðan völl en meðal þess sem bar á góma voru metnaðarfull markmið hins nýja meirihluta um húsnæðisuppbyggingu. Því hefur verið fleygt fram að byggja eigi tíu þúsund íbúðir í Úlfarsárdal.

Helga sagði mikið ákall innan Flokks fólksins um aukna húsnæðisuppbyggingu. Hún sagði misskilnings gæta um að áformað væri að byggja eingöngu upp félagslegt húsnæði, þótt vissulega yrði félagsleg blöndun í verkefninu. Byrjað yrði á svæði fyrir um 3.500 íbúðir sem hægt væri að ráðast hratt í að byggja.

Líf sagði nýja nálgun á húsnæðismálin byggja á því að unnið yrði með verkalýðshreyfingunni. Þar væri undir húsnæði fyrir alla Reykvíkinga, ekki aðeins félagsmenn verkalýðsfélaganna. 

Kerfið í borginni of þungt

Hildur sagði að henni litist illa á áform meirihlutans, en gaf þó þann fyrirvara að hann ætti enn eftir að sýna betur á spilin hvað þetta varðaði. Veruleikinn væri sá að byggja þyrfti upp mikið húsnæði í borginni, uppsafnaður húsnæðisvandi væri mikill til framtíðar og yrði ekki leystur á þessu kjörtímabili. 

„Við heyrum það frá verktökum og þeim sem standa að húsnæðisuppbyggingu, að þeir sækist frekar eftir því að byggja í nágrannasveitarfélögum. Ekki bara vegna þess að þar er framboð af lóðum heldur líka vegna þess að kerfið í Reykjavík er mjög þungt. Þar eru kvaðir og kröfur mjög miklar, tafir geta líka verið mjög miklar, með tilheyrandi fjármagnskostnaði. Þannig að fólki þykir þungt að byggja hér í Reykjavík.“

Hildur sagðist hlakka til að heyra nánar um útfærslu á félagslegri blöndun, en sagði að einnig þyrfti að byggja á markaðsforsendum og tryggja nægt framboð á húsnæði.

Efins um að hugur fylgi máli meirihlutans

Einar Þorsteinsson, sem var borgarstjóri þar til nýr meirihluti tók við, sagðist hafa áhyggjur af því að hugur fylgdi ekki máli hjá öllum meirihlutaflokkunum.

„Ég veit að Flokkur fólksins hefur mikinn metnað fyrir því að grípa til mikillar uppbyggingar þarna uppi í Úlfarsárdal. En við vitum það alveg að Samfylking og Píratar, og líklega Vinstri græn, hafa þá skoðun að það sé skynsamlegast að halda áfram og einblína á þéttingaráformin og byggja meðfram Borgarlínu. Þetta er allt saman skynsamlegt, Keldnalandið sé væntanlega á undan í uppbyggingunni og þetta eru sjónarmiðin sem hafa verið uppi. Við höfum verið að segja: Það þarf meira. Það þarf að setja fleiri báta af stað, því eftirspurnin er svo mikil,“ sagði Einar.

Það veki því áhyggjur hjá honum að heyra nýjan borgarstjóra tala um að áætlun um uppbyggingu sé til tuttugu, þrjátíu eða jafnvel fjörutíu ára.

Boða nýja nálgun

Helga sagði að í áformunum fælist stefnubreyting sem snerist einfaldlega um að brjóta, eða jafnvel nema, land. 

„Við verðum að vera skynsöm. Það er þannig að við erum líka skynsöm að segja að þetta taki mörg ár,“ sagði Helga. Aðkomu fleiri sveitarfélag þurfi, en ýta þurfi verkefninu úr vör. 

Líf bætti því við að skipulagsvinna geti verið tæknilega flókin, þegar rætt er um aðalskipulag, vaxtarmörk og svæðisskipulag. 

„Það sem liggur hér til grundvallar er ný nálgun, samhliða því að endurskoða aðalskipulag Reykjavíkur,“ sagði Líf. Í því fælist þó ekki að falla frá skipulagi reita sem tilbúnir væru til uppbyggingar.

Töluðu hvort ofan í annað og Helga bað um fókus

Einar spurði þá hvort vaxtarmörk væru undir, en Líf sagði að þeim yrði ekki breytt nema í svæðisskipulagsnefnd höfuðborgarsvæðisins,

„Mun þá þessi meirihluti styðja það að vaxtarmörkin verði færð út?“ spurði Einar. Líf svaraði því til að slíkt yrði rætt á vettvangi nefndarinnar eftir kosningar. Hildur spurði þá hvort ekki hefði náðst samstaða um vaxtarmörkin í nýjum meirihluta.

„Við höfum lagt til að það verði skoðað og rætt. Það tókst Einari ekki að gera,“ sagði Líf. 

„Samstaða um það að skoða og ræða, sem var akkúrat staðan í síðasta meirihluta um erfiðar ákvarðanir. Að skoða þær og ræða þær, en taka ekki ákvarðanir,“ sagði Einar. Líf svaraði því til að ákvörðun um að færa út vaxtarmörkin yrði tekin hjá svæðisskipulagsnefnd, og að samstaða yrði að ríkja um slíka ákvörðun þar.

„En borgin verður að leiða það. Borgin verður að hafa skoðun og vera jákvæð,“ sagði Einar. 

Þegar þarna er komið sögu voru oddvitarnir farnir að tala hver ofan í annan, þar til Berghildur náði að stýra þeim aftur inn á rétta braut, með eilítilli hjálp frá Helgu Þórðardóttur.

„Við skulum aðeins róa okkur, fókus,“ sagði Helga, áður en hægt var að halda umræðum áfram.

Þáttinn í heild sinni má finna í spilaranum hér ofar í fréttinni.