Tók vítið í leyfis­leysi og var skipt út af þótt að hann skoraði

Udinese vann leikinn 1-0 og sigurmarkið skoraði Lorenzo Lucca. Hann fékk þó enga hetjumeðferð heldur var tekinn af velli í refsingu fyrir frekju sína.

Þegar Udinese fékk víti í fyrri hálfleiknum þá hrifsaði Lucca til sín boltann og ýtti í burtu liðsfélögum sínum sem reyndu að ræða við hann. ESPN segir frá.

Ástæðan var sú að fyrirliðinn Florian Thauvian er vítaskytta liðsins og átti samkvæmt ákvörðun þjálfarans að taka þetta viti.

Leikmennirnir rifust um vítið en Lorenzo Lucca gaf sig ekki og tók spyrnuna. Hann skoraði en þjálfari Udinese átti sinn mótleik þrátt fyrir markið.

Það breytti engu að þetta var þriðja mark Lucca í fimm leikjum og Udinese í góðum málum.

Kosta Runjaic, þjálfari Udinese, tók hann samt að velli stuttu síðar en þá voru enn níu mínútur eftir af fyrri hálfleiknum.

Udinese hélt út og vann mikilvægan 1-0 sigur. Þetta vann ekki leik frá jólum fram til loka janúarmánaðar en hefur nú farið taplaust í gegnum síðustu fjóra leiki. LIðið er nú einu stigi á eftir Roma sem er í níunda sæti.