Tískan við þingsetningu: Snjórinn stoppaði ekki flottheitin

Dóra Júlía Agnarsdóttir skrifar 4. febrúar 2025 16:18

Þingmenn klæddust sínu fínasta pússi við þingsetningu í dag. SAMSETT

Alþingi var sett í dag við hátíðlega athöfn í Dómkirkjunni í kjölfar eftirminnilegra kosninga 2024. Margir nýir þingmenn mæta til leiks í fyrsta sinn og má skynja eftirvæntingu í loftinu. Eftirfarandi spurning brennur eflaust á einhverjum lesendum: Hverjir klæddust hverju?

Íslensk hönnun er að vanda áberandi á þingmönnum okkar og sömuleiðis íslenski þjóðbúningurinn. Diljá Mist Einarsdóttir hjá Sjálfstæðisflokknum og Arna Lára Jónsdóttir hjá Samfylkingunni völdu báðar hönnun Hildar Yeoman.

Arna Lára Jónsdóttir valdi grænan Yeoman kjól og græna skó við. Kristján Þórður Snæbjarnarson, Samfylkingunni, rokkaði blá jakkaföt við brúna skó.Vísir/Vilhelm

Diljá Mist Einarsdóttir í Yeoman setti við líflega prjónapeysu.Vísir/Vilhelm

Þorgerður Katrín Gunnarsdóttir, Guðrún Hafsteinsdóttir, Ingibjörg Isaksen og Halla Hrund Logadóttir skelltu sér allar í þjóðbúninginn.

Ingibjörg Isaksen, Framsókn, klæddist einstökum þjóðbúning.Vísir/Vilhelm

Sigríður Andersen, Sjálfstæðisflokknum, skartaði síðum svörtum loðfeldi og háum hælum.

Sigríður Andersen veigraði sér ekki við háum hælum í snjónum.Vísir/Vilhelm

Ragna Sigurðardóttir, Samfylkingunni, fór skandinavískar leiðir og valdi kjól frá danska tískumerkinu Gestuz, svarta kápu frá Stine Goya og skó frá hátískumerkinu Balenciaga. Hún var að vanda með skart frá Hik&Rós.

Ragna Sigurðardóttir hjá Samfylkingunni gekk örugg um í Balenciaga skóm og Gestuz kápu. Þórunn Sveinbjarnardóttir flokkssystir hennar skellti sér í appelsínugula úlpu en sambærilega úlpu má meðal annars finna hjá vörumerkinu Superdry.Vísir/Vilhelm

Ragna Árnadóttir skrifstofustjóri Alþingis og ein best klædda kona landsins sló ekki slöku við og var glæsileg í eldrauðum mjóum hælum og köflóttum mittisjakka. Þvílík tískuskvís.

Ragna Árnadóttir í rauðum háum hælum.Vísir/Vilhelm

Ragna Árnadóttir fer einstakar leiðir í tískunni.Vísir/Vilhelm

Þórdís Kolbrún, Sjálfstæðisflokknum, vakti athygli í gulri yfirhöfn við 70's bláar satín buxur. Guli liturinn er að ryðja sér til rúms í tískunni 2025.

Þórdís Kolbrún í gulum jakka og Hildur Sverrisdóttir flokkssystir hennar í dökkbláu.Vísir/Vilhelm

Áslaug Arna sem býður sig nú fram til formanns Sjálfstæðisflokksins var í Malene Birger silkikjól og Kalda stígvélum en Kalda er eitt heitasta íslenska skómerkið. Áslaug hélt svo á Gucci tösku í svörtum lit sem tónaði vel við stígvélin.

Áslaug Arna í kampavínstónuðum silkikjól.Vísir/Vilhelm

María Rut Kristinsdóttir, Viðreisn, er í blússu og skóm úr Hjá Hrafnhildi.

„Pilsið var svo í eigu Sigrúnar Gerðu Gísladóttur sem var eiginkona Einars Odds Kristjánssonar fyrrverandi þingmanns og ömmubróður míns á Sólbakka á Flateyri. Hún var mér mjög kær og mér fannst fallegt að fá að heiðra hana með pilsinu hennar. Enda var hún mjög elegant kona,“ segir María Rut í samtali við Vísi.

María Rut Kristinsdóttir, Viðreisn, í blússu og skóm úr Hjá Hrafnhildi og pilsi sem er henni mjög kært. Ingvar Þóroddsson, Viðreisn, í dökkgráum jakkafötum og Halla Hrund, Framsókn, í íslenska þjóðbúningnum.Vísir/Vilhelm

Þorgerður Katrín, utanríkisráðherra og formaður Viðreisnar, klæddist íslenska þjóðbúningnum en upphlutur Þorgerðar er frá ömmu hennar og nöfnu, Þorgerði. Hún klæddist honum fyrst árið 2000 og hann hefur fylgt henni í gegnum nokkrar þingsetningar.