Fót­brotnaði í NBA leik

Nú er komið í ljós að hinn 22 ára gamli Ivey fótbrotnaði en sperrileggurinn í vinstri fæti fór í sundur.

Ivey lenti í samstuði við Cole Anthony eftir að Anthony hafði runnið og lent á honum.

Ivey var ekki aðeins sárþjáður heldur var Anthony einnig sleginn vegna atviksins. Leikmenn beggja liða komu til að hughreysta þá en þeir áttu sumir líka erfitt með sig enda þetta ekki falleg sjón.

Það var strax ljóst að Ivey var mikið meiddur og starfsmenn Detroit Pistons héldu upp handklæðum til að hlífa áhorfendum, bæði heima í stofu sem og á vellinum, við þessum ljótu senum.

Ivey var fluttur í burtu á börum og myndataka sýndi síðan alvarleika meiðslanna.

Ivey er á sínu þriðja ári í deildinni en hann er að spila vel og var með 17,6 stig, 4,1 frákast og 4,0 stoðsendingar að meðaltali í leik.

Ivey mun missa næstum því af öllu tímabilinu.