Þekktir netþrjótar réðust á kerfi Wise

Í tilkynningu frá Wise, sem send var út seint í gærkvöldi, segir að öryggisáætlun hafi verið virkjuð um leið og árásin leit dagsins ljós. Helstu sérfræðingar frá netöryggisfyrirtækinu Syndis hafi verið kallaðir til aðstoðar og hafa þeir aðstoðað við að afla upplýsinga um umfang árásarinnar, greina stöðuna og tryggja varnir gegn frekari árásum. Ekki kemur fram hvaða glæpahópur gerði árásina.

Wise var í maí með tæplega tvö hundruð starfsmenn og yfir fjögurra milljarða veltu.

Sjá einnig: Wise og Þekking orðin eitt

Persónuvernd hefur verið greint frá árásinni og segir í tilkynningunni að verið sé að upplýsa þá viðskiptavini sem málið snertir um atvikið.

Þá segir í tilkynningunni að Wise sé vottað samkvæmt alþjóðlegum öryggisstöðlum og unnið sé að því að tryggja kerfi fyrirtækisins gegn frekari árásum.

„Wise mun hafa gagnsæi að leiðarljósi og er frekari upplýsinga að vænta um leið og þær liggja fyrir,“ segir að endingu í tilkynningunni.