Þrjú fá kaup­rétt fyrir alls 277 milljónir

Í tilkynningu Símans til Kauphallar segir að stjórn félagsins hafi ákveðið í gær að veita Maríu Björk Einarsdóttur forstjóra kauprétt að 11.250.000 hlutum, Birki Ágústssyni, framkvæmdastjóra miðla, kauprétt að 5.625.000 hlutum og Vésteini Gauta Haukssyni, framkvæmdastjóra auglýsingamiðlunar, kauprétt að 5.625.000 hlutum.

Öll ný í framkvæmdastjórninni

María Björk tók við stjórnartaumunum af Orra Haukssyni í júní og þeir Birkir og Vésteinn Gauti komu inn í framkvæmdastjórn um miðjan september.

Í tilkynningu segir að kaupréttarsamningunum sé ætlað að samtvinna hagsmuni starfsmanna og félagsins til lengri tíma. Skilmálar þeirra séu í samræmi við starfskjarastefnu félagsins sem hafi verið samþykkt á aðalfundi Símans hinn 14. mars 2024.

Heildarfjöldi útistandandi kauprétta sem Síminn hefur veitt stjórnendum og tilteknum lykilstarfsmönnum sínum nemi nú 69.375.000 hluta, eða um 2,62 prósentum hlutafjár í félaginu. Alls séu um að ræða nítján starfsmenn. Heildarkostnaður félagsins vegna útistandandi samninga út nýtingartímann sé áætlaður um níutíu milljónir og þá sé byggt á reiknilíkani Black-Scholes.

Ávinnst á þremur árum

Í tilkynningu segir að grunnverðið sé 12,31 króna á hlut en skuli þó ekki vera lægra en vegið meðalverð með hluti félagins síðustu tíu heilu viðskiptadaga á aðalmarkaði Nasdaq Ísland með hluti félagsins fyrir úthlutun kauprétta. Grunnverð samninganna sé sama verð og núgildandi nýtingarverð annarra stjórnenda sem gerðu kaupréttarsamning 17. maí 2023, uppreiknað með tilliti til vaxta. 

Við grunnverð bætist vextir sem skuli samsvara stýrivöxtum Seðlabanka Íslands á tímabilinu frá dagsetningu kaupréttarsamnings fram til nýtingardags, að lágmarki fjögur prósent á ári. Verðið skuli leiðrétt meðal annars fyrir arðgreiðslum sem kunni að verða greiddar frá útgáfudegi kaupréttanna.

Kauprétturinn ávinnist á þremur árum frá úthlutun. Að ávinnslutímabili loknu verði kaupréttir nýtanlegir í þremur áföngum, sem hefjist í kjölfar birtingar ársuppgjörs félagsins ár hvert á árunum 2028 til 2030. Kaupréttarhafi geti nýtt þriðjung kaupréttar í kjölfar birtingar ársuppgjörs eða hálfsársuppgjörs félagsins innan hvers tímabils, og geti frestað nýtingu áunnins kaupréttar til næsta nýtingartímabils.