Leggja til að fleiri heil­brigðis­stéttir geti gefið út vott­orð

 Starfshópurinn leggur einnig til að aukin verði notkun stafrænna lausna og gerð verði greiðari miðlun gagna á milli stofnana svo hægt sé að einfalda vottorðakerfið. Þá leggur starfshópurinn til að sameinuð verði vottorð sem fjalli um tengd málefni eins og vegna örorku, stæðiskorta og styrkja. Þá er lagt til að gildistími vottorða verði lengdur í vottorðum sem krefjast reglulegrar endurnýjunar vegna langvarandi eða varanlegs ástands, eins og til dæmis vegna hreyfihömlunar.

Sjá einnig: Læknar sagðir út­býta vott­orðum eins og sæl­gæti

Þá leggur hópurinn til að endurskoðuð verði ákvæði laga þar sem krafist er vottorða til að samræma framkvæmdina betur innan heilbrigðiskerfisins. Þá er að lokum bent á að gildistaka nýrra laga í september á næsta ári um örorkukerfið muni einnig leiða til verulegrar einföldunar.

Tillögurnar eru lagðar fram í nýrri skýrslu starfshópsins sem birt var í dag á vef stjórnarráðsins. Í tilkynningu kemur fram að á hverju ári séu gefin út hundruð þúsunda vottorða í heilbrigðiskerfinu. Landspítali og heilsugæslan hafi sem dæmi á síðasta ári gefið út 190 þúsund vottorð. Flest séu þau gefin út að beiðni opinberra stofnana til að tryggja réttindi einstaklinga í tengslum við ýmsa þjónustu.

Vottorð útgefin af Landspítala á liðnu ári voru rúmlega 46.700 og tæplega 145.200 hjá heilsugæslustöðvunum. Flest vottorðanna voru gefin út af heilsugæslulæknum. Þá er bent á að útgefin vottorð ár hvert séu umtalsvert fleiri, því sambærileg vottorð eru gefin út hjá heilbrigðisstofnunum um allt land og á Sjúkrahúsinu á Akureyri.

Langflest vottorð voru gefin út vegna fjarvista frá vinnu, tæplega 40.000, næst komu beiðnir um sjúkraþjálfun, tæplega 30.000 og í þriðja sæti voru svokölluð almenn vottorð, um 15.700. Í fjórða og fimmta sæti voru vottorð vegna ökuréttinda, um 13.000 og útgáfa lyfjaskírteina, um 13.000.

Að beiðni opinberra stofnana

Stór hluti vottorða er gefinn út að beiðni opinberra stofnana, svo sem Tryggingastofnunar, Sjúkratrygginga Íslands og Vinnumálastofnunar, en einnig eru gefin út vottorð fyrir menntastofnanir, atvinnurekendur og tryggingafélög. Í skýrslunni er ítarlega fjallað um hvers konar vottorð er algengast að séu gefin út fyrir hverja stofnun. Sem dæmi er algengt að gefin út séu vottorð vegna endurhæfingarlífeyris, örorkulífeyris eða hreyfihömlunarvottorð fyrir Tryggingastofnun.

Hvað varðar Sjúkratryggingar eru til dæmis gefin út vottorð vegna sjúkraþjálfunar, fyrir lyfjaskírteini, sjúkradagpeninga og umsókna um hjálpartæki og talþjálfun. Í skýrslunni kemur til dæmis fram að búið sé að leggja til breytt fyrirkomulag um vottorð í sjúkraþjálfun og lagt til að börn geti farið í einn tíma í talþjálfun án vottorðs.

Tíunda vinsælasta vottorðið vegna væntanlegrar fæðingar

Hvað varðar Vinnumálastofnun eru til dæmis gefin út vottorð vegna fæðingarorlofs og barneigna. Sem dæmi er tíunda algengasta vottorðið hjá heilsugæslu höfuðborgarsvæðisins vottorð vegna væntanlegrar fæðingar en það er eina vottorðið sem ljósmæður mega gefa út í tengslum við rétt hjá Fæðingarorlofssjóði. Þá eru einnig gefin út vottorð vegna atvinnuleysisbóta og sorgarleyfis. Þá er í skýrslunni einnig fjallað um útgáfu vottorða vegna ökuréttinda og stæðiskorta sem bæði eru gefin út hjá sýslumönnum.

Þá er að lokum fjallað um önnur vottorð svo sem vottorð vegna fjarvistar úr vinnu eða skóla. Lagt er til í skýrslunni að það verði skoðað í samvinnu við vinnumarkað og menntastofnanir hvort hægt sé að finna aðrar leiðir til að ná markmiðum en með þessum vottorðum þegar veikindi eru í færri daga en sjö.