Miður að mis­brestur hafi orðið í þjónustu neyðar­mót­tökunnar

Dómur féll í gær í máli knattspyrnumannsins Alberts Guðmundssonar. Hann var fyrir dómi sýknaður af ákæru um kynferðisbrot og taldist frásögn hans trúverðugri en konunnar sem sakaði hann um að brjóta á sér kynferðislega með því að sleikja kynfæri hennar og stinga fingrum sínum í leggöng hennar. Í dómnum, sem var birtur í gær, kom fram að konan hefði leitað á neyðarmóttökuna fyrir þolendur kynferðisbrota þann 26. júní en verið sagt að koma aftur. Haft hafi verið samband við hana símleiðis daginn eftir og hún boðuð í viðtal þann 28. júní.

„Líkamsskoðun fór þó einhverra hluta vegna ekki fram, heldur var aðeins tekið við hana viðtal,“ segir í dómi.

Í dómi er einnig að finna lýsingu konunnar sjálfrar á móttökunni á neyðarmóttökunni. Þar kemur fram að hún hafi verið látin bíða í tjaldi við komu í biðstofu. Hún hafi óskað eftir skoðun og nefnt þar að Albert hefði verið harðhentur við sig. Henni hafi þá verið sagt að koma aftur daginn eftir „Það breytti engu þar sem ákærði hefði ekki fengið sáðlát inni í henni.“

Sjá einnig: Farið yfir dóminn: Albert metinn trú­verðugri en konan

Þá er einnig í dómi vitnað í hjúkrunarfræðing sem er vitni í málinu. Hún segir þar að mistök hafi verið gerð þegar konan leitaði fyrst á móttökuna. Það hafi verið rætt við hana á biðstofu sem sé ekki hefðbundið verklag auk þess sem neyðarmóttaka hafi ekki verið upplýst að maðurinn hefði sett fingur í leggöng hennar. Neyðarmóttakan hafi haft samband daginn eftir en þá hafi hún verið búin að fara í sturtu.

Anne Marie segir ferlið sem unnið sé eftir á neyðarmóttökunni alveg skýrt og það sé miður að misbrestur hafi orðið á því. 

„Ferlið okkar er með þeim hætti að fólk sem til okkar leitar fær samtal við hjúkrunarfræðing í einrúmi. Ef brot átti sér stað innan 72 klukkustunda köllum við til lækni og hjúkrunarfræðing sem framkvæma líkamsskoðun og tryggja þannig mikilvæg sönnunargögn ef til sakamáls kemur,“ segir Anne Marie í skriflegu svari til fréttastofu.

Markmið að bjóða upp á faglega og áreiðanlega þjónustu

Sé liðinn lengri tími frá broti sé frásögn tekin niður og út frá henni metið hvort þörf sé á líkamsskoðun, en ætíð boðið upp á heilsufarsskoðun.

„Fólk sem til okkar leitar nýtur þverfaglegrar þjónustu og getur fengið áfallameðferð hjá sálfræðingi, auk þess að eiga rétt á samtali við réttargæslumann,“ segir Anne Marie.

Þá segir hún markmið neyðarmóttökunnar að bjóða upp á faglega og áreiðanlega þjónustu sem sé framkvæmd af umhyggju og virðingu.

„Það skiptir okkur miklu máli að þau sem til okkar leita geti treyst okkur og að stofnanir samfélagsins og félagasamtök geti gert það líka. Við vitum að okkar störf geta haft bein áhrif á meðferð sakamála og tökum réttarlæknisfræðilegan hluta starfs okkar mjög alvarlega. Almennt stöndum við undir þessu en þarna hefur orðið misbrestur á þjónustunni, sem er mjög miður.“