Afar ó­lík­legt að byrlunar- og símastuldarmálinu sé lokið

Ummælin lét Sigurður falla í Dagmálum á mbl.is og greint frá í Morgunblaðinu. 

Eins og kunnugt er orðið fengu sex blaðamenn réttarstöðu sakbornings í málinu, sem varðaði þjófnað á síma Páls Steingrímssonar skipstjóra. Fréttir sem byggðu á gögnum úr símanum voru birtar í Kjarnanum og Stundinni.

Sigurður segir erfitt að sjá hvernig ríkissaksóknari komist hjá því að taka málið upp á ný en einnig eigi Páll kost á því að höfða einkamál, mögulega gegn Ríkisútvarpinu eða Þóru Arnórsdóttur, þáverandi ritstjóra Kveiks.

Þóra var grunuð um að hafa veitt símanum viðtöku eftir að eiginkona Páls stal honum þegar Páll lá á sjúkrahúsi.

Að sögn Sigurðar hefur umfjöllun um málið verið afvegaleidd; það sé flókið og grafalvarlegt, bæði sem sakamál og hvað varðar hlutverk fjölmiðla. Þá segir hann ágalla hafa verið á rannsókn lögreglu.

Ásakanir hafa gengið á báða bóga en Páll og Þórður Snær Júlíusson, blaðamaður og einn sakborninga, hafa verið sammála um eitt eftir ákvörðun lögreglustjóra og það er að málið megi aldrei endurtaka sig.

Blaðamannafélagið hefur boðað til Pressukvölds með sexmenningunum, þar sem meðal annarst stendur til að svara þeim spurningum hvaða áhrif málið hefur haft á blaðamennina og stéttina í heild. Fundurinn er aðeins opinn félagsmönnum.