Sér eftir að hafa valið Val fram yfir KR

Það var í janúar árið 2019 sem greint var frá því að Gary Martin væri orðinn leikmaður Vals. Félagsskipti sem vöktu mikla athygli á sínum tíma og áttu eftir að draga dilk á eftir sér því aðeins um fimm mánuðum seinna komust Valur og Gary að samkomulagi um starfslok.

Í tilkynningunni sem fylgdi lét Ólafur Jóhannesson, sem þáverandi þjálfari Vals sem hafði orðið Íslandsmeistari árið áður, hafa eftir sér að hann og Gary væru ólíkir karakterar með ólíkar áherslur. Óhætt er að segja að Gary, sem hafði árin áður verið á mála hjá Lokeren í Belgíu og Lilleström í Noregi, sjái eftir ákvörðun sinni að ganga til liðs við Val.

Ekki já maður 

„Ég tók ranga ákvörðun,“ segir Gary í viðtali hjá íþróttadeild Stöðvar 2. „Ég hefði ekki átt að ganga til liðs við Val. Ég hefði átt að fara aftur til KR. Kannski var ég bara of gráðugur. Samningurinn sem Valur bauð mér var betri. Valur er ekki mitt félag. KR er mitt félag. Þetta er eftirsjá hjá mér á ferlinum. Að hafa valið Val fram yfir KR. En svona var þetta bara.“

Mikið var rætt og ritað um málið á sínum tíma og fóru af stað sögur um að erfitt væri að vinna með Gary. Hann er að sjálfsögðu ekki sammála því.

„Ástæðan fyrir brotthvarfi mínu samanstendur kannski af mörgum mismunandi þáttum. Fólk hefur þá skoðun á mér að það sé erfitt að hafa stjórn á mér. Það er hins vegar auðvelt. Ég er sterkur karakter og ef ég er ekki sammála einhverju þá mun ég viðra þá skoðun mína og tala hreint út. Þannig er ég úr garði gerður. Ég er ekki já-maður.“

„Þessi kafli á mínum ferli er mjög stuttur. Ég vann þó mína vinnu þarna. Tölfræðin talar sínu máli. Hjá Val skoraði ég níu mörk í níu leikjum. Ég brenndi engar brýr en Óli Jó er með svarið við þeirri spurningu af hverju þetta gekk ekki upp hjá okkur.“

Leið vel í Vestmannaeyjum 

Gary gekk á endanum til liðs við ÍBV sem var botnlið efstu deildar á þessum tíma.

„Ég fékk boð um að ganga til liðs við KR þarna en mín hugsun var sú að ef ég færi í Vesturbæinn og KR stendur ekki uppi sem Íslandsmeistari þá yrði mér kennt um það.

Ég elska áskoranir og vissi að ég gæti ekki farið til ÍBV, verið í Vestmannaeyjum og tæklað þetta verkefni með hangandi haus. Ég yrði að gefa allt mitt í alla leiki. Því það yrði auðvelt að sjá ef ég myndi ekki gera það. Öll augu yrðu á mér. Mér leið mjög vel í Vestmannaeyjum.“

„Tel að það verði aldrei leikið eftir“ 

ÍBV féll úr deildinni það tímabilið en Gary fann hins vegar netmöskvana reglulega og endaði sem markahæsti leikmaður deildarinnar.

„Í versta liði deildarinnar. Ég tel að það verði aldrei leikið eftir hér á landi.“Og það er leikur ÍBV og Vals í Vestmannaeyjum þetta sama tímabil sem er eftirlætis leikur Gary Martin frá ferli hans hér á landi en hann skoraði bæði mörk Eyjamanna í 2-1 sigri.

Og það er leikur ÍBV og Vals í Vestmannaeyjum þetta sama tímabil sem er eftirlætis leikur Gary Martin frá ferli hans hér á landi en hann skoraði bæði mörk Eyjamanna í 2-1 sigri.

„Ég gjörsamlega gekk frá þeim og gat gert það sem að ég vildi gegn þeim. Ég aldrei, hvorki fyrr né síðar, spilað svona. Ég hljóp fram hjá þeim, gat gert það sem að ég vildi. Það var einhvern veginn allt auðveldara þennan dag. Kannski við kemur það hugarfari mínu komandi inn í leikinn. Mér fannst ég þurfa að sanna eitthvað fyrir Óla Jó. Þetta var mín besta frammistaða á ferlinum.“