Ejub látinn fara af fjár­hags­legum á­stæðum

Davíð Þór Viðarsson, yfirmaður knattspyrnumála hjá FH, greindi frá þessu í samtali við Vísi.

„Það er bara þess vegna sem þetta er, fjárhagsleg endurskipulagning hjá deildinni“ sagði Davíð.

Eruð þið þá að leita að einhverjum ódýrari kosti í þetta starf?

„Nei, nei. Við munum bara leysa það innanhús. Það er ákveðin endurskipulagning í gangi og þetta er bara eitt skref í henni, svo bara höldum við áfram.“

Davíð sagði að starfið sem Ejub hefur sinnt eigi eftir að dreifast á aðra aðila innan knattspyrnudeildarinnar, aðallega þá þjálfarana sem eru þegar til staðar í yngri flokkunum en hann muni sjálfur einnig bera einhvern þunga.

Ejub hefur verið orðaður við lausa þjálfarastöðu hjá u21 árs landsliði karla í fótbolta og bjuggust einhverjir við því að það væri ástæða starfslokanna. 

Ejub sagði hins vegar í samtali við Vísi að næstu skref hjá honum væru óráðin. Hann væri ekki að ganga inn í u21 starfið á næstu dögum. 

Tilkynningu FH má sjá hér fyrir neðan.