Upp­gjörið og við­töl: Valur - FH 2-0 | Nadía kláraði FH-inga

Valur vann 2-0 sigur gegn FH. Nadía Atladóttir fór á kostum og skoraði bæði mörk heimakvenna. 

Eftir tuttugu mínútur af tíðindarlitum leik dró til tíðinda á 24. mínútu þegar Nadía Atladóttir kom Val yfir. Fanndís Friðriksdóttir gerði vel í að leika á varnarmann FH og renndi síðan boltanum á Nadíu sem átti skot í fyrsta og skoraði.

Eftir mark Vals spilaðist leikurinn nákvæmlega eins og fyrstu tuttugu mínúturnar. Valskonur héldu betur í boltann en hvorugu liðinu tókst að ógna á síðasta þriðjungi. Staðan í hálfleik var 1-0.

Seinni hálfleikur spilaðist nákvæmlega eins og sá fyrri. Það var lítið um marktækifæri þar til á 68. mínútu. Þá var Nadía Atladóttir aftur á ferðinni og skoraði sitt annað mark. Boltinn datt beint fyrir hana í teignum eftir klaufalegan varnarleik og Nadía var ekki í vandræðum með að klára færið.

Leikurinn endaði með 2-0 sigri Vals

Atvik leiksins

Annað markið var atvik leiksins. FH hafði fengið ágætis færi einu marki undir en gestirnir gerðu sig seka um klaufaleg mistök í öðru marki Vals sem kláraði leikinn endanlega.

Stjörnur og skúrkar

Nadía Atladóttir var stjarna leiksins. Nadía var frábær í dag og nýtti færin sín gríðarlega vel sem skilaði tveimur mörkum.

Varnarleikur FH í öðru marki Vals leit afar illa út. Boltinn fór í gegnum vörn FH og beint á Nadíu sem þakkaði fyrir sig og skoraði.

Dómarinn

Aðalbjörn Heiðar Þorsteinsson dæmdi leik dagsins og gerði það vel. Það var gott flæði í leiknum og Aðalbjörn var ekki að flauta að óþörfu.

Stemning og umgjörð

Veðrið lék við áhorfendur í dag. Það var það mikil sól að Fanney Inga Birkisdóttir þurfti að vera með derhúfu í markinu.

Guðni: Þær nýttu færin ekki við

Guðni Eiríksson, þjálfari FH, var nokkuð brattur þrátt fyrir 2-0 tap gegn Val.

„Mér fannst munurinn á liðunum vera þessi tvö mörk. Við vorum ekki nógu góðar fyrir framan markið á meðan þær kláruðu sín færi. Þær eru með einstaklingsgæði og leikmenn í háum klassa og þær refsuðu okkur en mér fannst við ekki slakari aðilinn í þessum leik,“ sagði Guðni Eiríksson eftir leik.

Guðni var ekki ánægður með varnarleik liðsins í mörkunum sem Nadía Atladóttir, leikmaður Vals, skoraði.

„Við gerðum mistök. Þetta var ekki þannig að Valur spilaði sig í gegnum okkur heldur voru þetta mistök hjá okkur sem urðu til þess að Valur skoraði. Á meðan vorum við ekki að nýta okkar tækifæri.“

Þegar FH var einu marki undir hafði Guðni trú á því að hans lið myndi jafna og að hans mati voru tækifæri til þess.

„Ég held að Valsliðinu hafi ekki liðið vel og þær róuðust við það að bæta við öðru marki. Í stöðunni 1-0 hefðum við getað jafnað og mér fannst þetta vera í járnum og það benti ekkert til þess að þær myndu skora frekar en við,“ sagði Guðni Eiríksson eftir leik.