Að­komu­maður ráfaði inn í hús á Þjóð­há­tíð og lýsti eftir hús­ráðanda

Svona hljóma skilaboð ónefnds föður sem greip til þess ráðs að auglýsa eftir húsráðanda þegar sonurinn kom í land eftir líflega verslunarmannahelgi.

„Þetta var á laugardagskvöldinu eftir miðnætti og honum var auðvitað hent út þegar húsráðandi kom að honum sofandi. Hann man ekki hvaða hús þetta var,“ skrifar faðirinn og bætir við að mögulega hafi Scarpa gönguskór í stærð 47 orðið þar eftir ásamt jakka og gráum Boss bakpoka.

Bjarni Ólafur Guðmundsson, Eyjamaður og kynnir á Þjóðhátíð, deildi sögunni á Facebook.

„Þetta er sonur manns sem hafði samband við mig og var að velta fyrir sér hvort ég gæti hjálpað honum að finna aðilann sem hann í rauninni labbaði inn á,“ segir Bjarni.

„Viðkomandi var bara mjög illa áttaður greinilega eftir kvöldið, og var mjög miður sín.“

Fljótlega leystist ráðgátan, samstarfsmaður Bjarna steig fram og hann fékk símtal með afsökunarbeiðni. Á sama tíma fundust fötin sem ungi maðurinn hafði skilið eftir í húsinu. Litlu mátti muna að þau hefðu endað á nytjamarkaði í Heimaey.

„En af því að viðkomandi hafði ekki haft tíma til að fara með það þá var þetta enn þá hjá þeim. Það var meira að segja búið að þvo fötin. Þetta er rosa þjónusta,“ bætir Bjarni við og hlær.

Taktísk mistök

Bjarni segir málið hafa verið leyst án eftirmála og menn læri af reynslunni.

„Við getum kannski flokkað þetta undir taktísk mistök því maðurinn kemur inn í hús hjá öðrum aðila, fer úr skónum og fer úr utanyfirfötunum þannig að hann var greinilega bara að koma heim til sín.“

„Við erum bara svo heppin Eyjamenn hvað við erum að fá mikið af góðu fólki til Vestmannaeyja á öllum aldri. Það skiptir ekki máli, fólki verður á mistök og svo leysum við bara úr því. Allavega virðist hátíðin koma vel undan þessu öllu saman þrátt fyrir ótrúlega erfiðar aðstæður á köflum,“ segir Bjarni en veðrið lék illa við Eyjamenn og gesti síðustu helgi.

Sumir misskilið færsluna

Bjarni hefur lengi verið viðloðinn Þjóðhátíð og segir hátíðina skipta íbúa miklu máli. „Menn lenda í því að fara á vitlausa staði og lenda bara í alls konar.“

„Þegar ég birti þetta fyrst á Facebook þá virkaði þetta eins og ég væri að tala um son minn. Það fór aðeins að kvisast um og fólk var að spyrja fólk í kringum mig hvort að sonur minn væri farinn að drekka,“ segir Bjarni léttur. Gott hafi verið að greiða úr þeim misskilningi og finna farsæla lendingu.

Húsráðandi vildi ekki tjá sig um málið þegar eftir því var leitað.