Banna fisk­eldi í opnum kvíum við strendur Bresku-Kólumbíu

Bannið er framhald af stefnumótun sem hófst fyrir um það bil fimm árum en þá var ákveðið að færa allt fiskeldi yfir í lokaðar kvíar til að vernda villta laxastofna. Jonathan Wilkinson, auðlindaráðherra, segir um að ræða skref í þágu laxastofnanna, náttúrunnar, sjálfbærni og hreinnar tækni.

Sjókvíaeldi er umfangsmikið í Bresku-Kólumbíu og samtök fyrirtækja í iðnaðinum segja að um 6.000 störf muni hverfa ef af banninu verður. Sjókvíaeldi skapi 880 milljónir Bandaríkjadala í tekjur fyrir samfélögin á svæðinu.

Brian Kingzet, framkvæmdastjóri BC Salmon Farmers Association segir óraunhæft að ætla að hefja framleiðslu á 70.000 tonnum af laxi á landi eftir fimm ár en áætlanirnar séu í engu samræmi við núverandi tæknilega getu.

Stjórnvöld segjast á móti munu kynna áætlun á næstunni sem miðar að því að koma til móts við frumbyggjasamfélög og starfsmenn í sjókvíaeldi og draga úr neikvæðum efnahagslegum áhrifum bannsins.

Skoðanakannanir sýna að meirihluti íbúa Bresku-Kólumbíu er fylgjandi banninu og þá hafa yfir 120 hópar frumbyggja á svæðinu lýst yfir stuðningi við landeldi.

Guardian greindi frá.