Fjár­festa fyrir þrjá milljarða í Reykja­nes­bæ og Hafnar­firði

Heildarvirði þessara tveggja fasteigna er 2.200 m.kr. og verða kaupin fjármögnuð með handbæru fé og lánsfé. Leigutekjur á ársgrunni nema rúmlega 160 milljónum króna. Kaupin leiða til þess að áætlaður rekstrarhagnaður (NOI) Reita hækkar um 145 milljónir króna á ársgrundvelli.

„Kaup húsnæðis dagdvalarinnar á Nesvöllum markar fyrsta skrefið í vaxtarvegferð Reita innan nýrra samfélagslegra mikilvægra eignaflokka. Sem stærsta fasteignafélag landsins á sviði atvinnuhúsnæðis búa Reitir yfir gífurlegri reynslu og þekkingu á rekstri og viðhaldi húsnæðis. Við lítum á það sem okkar hlutverk og ábyrgð að beina okkar kröftum til uppbyggingar og eflingar þeirra samfélagslegu innviða sem samfélagið kallar á hverju sinni. Við stefnum á frekari fjárfestingar í eignum sem svara breyttri aldurssamsetningu þjóðarinnar og horfum sér í lagi til hjúkrunarheimila og lífsgæðakjarna í þeim efnum,“ segir Guðni Aðalsteinsson, forstjóri Reita, í tilkynningu.

Eignin í Hafnarfirði að Lónsbraut 1 Hafnarfirði var byggð 2011 og er 1.725 fermetrar að stærð. Fasteignin hýsir fiskvinnslu Hólmaskers ehf. sem er dótturfélag Vinnslustöðvarinnar. Leigusamningur er til 2033.

Áætlað er að afhending eignanna eigi sér stað eigi síðar en 1. ágúst næstkomandi. Afhending mun fara fram þegar fyrirvörum um viðskiptin hefur verið aflétt en fyrirvarar eru gerðir um niðurstöður hefðbundinna áreiðanleikakannana, afléttingu forkaupsréttar að Lónsbraut 1 og samþykki stjórnar Reita fasteignafélags hf. fyrir kaupunum.

Kaup Reita á ÞEJ fasteignum ehf.

Í tilkynningunni kemur fram að Reitir hafa einnig gengið frá kaupum á ÞEJ fasteignum ehf.. Félagið á tæplega 3.100 fermetra verslunarhúsnæðis við Fákafen 11, Faxafen 12, Skólavörðustíg 10, Laugaveg 32 og Laugaveg 86 til 94. Húsnæðið hýsir ýmsa leigutaka, þar á meðal veitingastaðinn Saffran.

Heildarvirði er 1.150 milljónir króna og eru kaupin, samkvæmt tilkynningunni, að fullu fjármögnuð með handbæru fé og lánsfé. Leigutekjur á ársgrunni nema rúmlega 110 milljónir króna. Kaupin leiða til þess að áætlaður rekstrarhagnaður (NOI) Reita hækkar um 85 milljónir króna á ársgrundvelli. Afhending eignanna fór fram síðastliðin mánaðamót.