Magni kaup­maður látinn 88 ára að aldri

Magni var gjarnan kenndur við spilabúð sína „Hjá Magna“ og setti hann heldur betur lit sinn á miðborgina. Hann bar af sér ákaflega góðan þokka, var sjentilmaður og einkar vinsæll meðal fjölmiðlamanna þegar þurfti að taka púlsinn á miðborgarstemmningunni. 

Það má því sannarlega segja að skarð sé fyrir skildi með brotthvarfi hans, miðborgin er önnur. Reykjavík er önnur en hún var eftir að bílaumferð var bönnuð og túristabúðirnar tóku yfir. En Magni var reyndar sestur í helgan stein.

Magni rak Frímerkjamiðstöðina á Skólavörðustíg með viðskiptafélögum sínum. Þar höndlaði Magni með frímerki, myntir og ýmsa aðra safnmuni. Árið 1978 stofnaði Magni svo „Hjá Magna“ að Laugavegi 15 og þar bættust hin ýmsu spil við safnmunina. Magni rak þá verslun ásamt eiginkonu sinni Steinunni Guðlaugsdóttur og sagði hann í samtali við Vísi að galdurinn við að tóra svo lengi væri „að eiga góða konu sem stendur með manni, eiga skemmtilega og vinsæla búð og hafa húmor. Ef það er rólegt að gera þýðir ekkert að gráta, það verður kannski meira að gera á morgun.“

Magni var einstaklega viðræðugóður og þegar hann lét af störfum að verða sjötugur sagðist hann vilja eiga einhvern tíma til að leika sér, hvort einhver vildi ekki kaupa og halda áfram að vera Jókerinn við Laugaveg. Þar segir að allar götur síðan 1979 hafi Magni verið órjúfanlegur partur af Laugaveginum og orðið nánast tákngervingur kaupmannsins. „Það þekkja mig allir hérna og ég get hvergi skandalíserað, það er mínusinn við þetta," segir hann og hlær.

Magni var kvæntur Steinunni sem lifir mann sinn en hún er fædd 1942. Þá skilur hann eftir sig þrjú uppkomin börn: Oddnýju Elínu f. 1964, Guðmund Hauk f. 1969 og Ingibjörgu f. 1974, sex barnabörn og þrjú barnabarnabörn.