Lögmenn Trumps höfðu farið fram á að Willis lýsti sig vanhæfa í málinu en Fultonsýsla er sú stærsta í Georgíu og ólíklegt er að annar héraðssaksóknari hefði tök á að taka við málinu gegn Trump á næstunni.
Dómari komst þó að þeirri niðurstöðu í gær að Willis þyrfti ekki lýsa sig vanhæfa, svo lengi sem Wade kæmi ekki lengur að málinu. Hann sagði svo af sér nokkrum klukkustundum síðar.
Hrósaði Wade fyrir fagmannleika
Trump og aðrir hafa verið ákærðir af yfirvöldum í Georgíu fyrir að reyna að stnúa úrslitum forsetakosninganna þar árið 2020. Nokkrir þeirra voru ákærðir fyrir að reyna að stela kjörgögnum og eiga við kosningavélar en kjarni ákæranna snýr að því að reynt hafi verið að fá hóp til Repúblikana í Georgíu til að staðfesta ranglega að þeir væru réttkjörnir kjörmenn ríkisins og senda Bandaríkjaþingi skjöl þess efnis þrátt fyrir að kjörmennirnir ættu með réttu að tilheyra Joe Biden.
Sjá einnig: Falskir kjörmenn og lygar kjarninn í málinu gegn Trump
Willis réði Wade til að sjá um málaferlin gegn Trump, þó hann hefði litla reynslu í dómsal. Undir lok síðasta árs kom svo í ljós að þau hefðu átt í ástarsambandi þegar hún var boðuð í vitnaleiðslur vegna skilnaðar Wade og eiginkonu hans.
Lögmenn Trumps og annarra verjenda fóru svo í framhaldið fram á að Willis kæmi ekki að málaferlunum lengur.
Sjá einnig: Meint framhjáhald gæti tafið málaferli gegn Trump um ár
Þegar Willis tók við afsögn Wade hrósaði hún honum fyrir fagmannleika og virðugleika.
Ekki er ljóst hvort Willis hafi skipað nýjan saksóknara eða hvort úrskurðurinn muni tefja málaferlin gegn Trump, þó ekki liggi heldur fyrir hvenær þau eiga að hefjast.
Vann tafir í New York
Trump og lögmenn hans hafa lagt mikið púður í það að reyna að tefja öll fjögur dómsmálin sem að honum beinast þessa dagana. Takist honum að tefja réttarhöldin fram yfir kosningar og sigri hann Joe Biden, gæti hann beitt völdum embættisins til að stöðva málaferlin gegn honum eða jafnvel náða sjálfan sig.
Þar náðist einnig árangur í gær í máli saksóknara á Manhattan gegn Trump vegna þagnargreiðslu til Stormy Daniels, fyrrverandi klámstjörnu, í aðdraganda forsetakosninganna 2016. Réttarhöld áttu að hefjast þann 25. mars en þeim var í gærkvöldi frestað til miðs apríl, í fyrsta lagi, því lögmenn Trumps vildu skoða ný gögn í málinu.
Lögmenn Trumps höfðu farið fram á þriggja mánaða seinkun vegna nýrra skjala sem eru meira en hundrað þúsund blaðsíður.
Donald Trump hefur verið ákærður fjórum sinnum.
Jack Smith, sérstakur rannsakandi dómsmálaráðuneytis Bandaríkjanna, hefur ákært Trump í tveimur málum. Annað þeirra snýr að viðleitni hans til að snúa úrslitum forsetakosninganna í Bandaríkjunum árið 2020 á landsvísu. Réttarhöldin áttu að hefjast 4. mars en hefur verið frestað um óákveðinn tíma.
Hitt snýr að opinberum gögnum og leynilegum skjölum sem hann tók með sér úr Hvíta húsinu þegar hann flutti til Flórída og neitaði að afhenta. Réttarhöldin eiga að hefjast í maí.
Hann hefur einnig verið ákærður í New York fyrir brot á lögum um kosningar vegna þagnargreiðslu til klámmyndaleikkonunnar Stormy Daniels. Réttarhöldin áttu að hefjast 25. mars en hefur verið frestað til 15. apríl eða lengur.
Trump hefur þar að auki verið ákærður í Georgíu og fyrir að reyna að snúa úrslitum kosninganna þar. Ekki er búið að ákveða hvenær réttarhöldin í Georgíu eiga að hefjast en búið er að ákveða að sýnt verði frá þeim í beinni útsendingu.
