Ís­land aldrei fengið jafn slæma ein­kunn á spillingar­lista

Mælingin byggir á rannsóknum sérfræðinga og upplifun viðskiptaforkólfa í hverju landi fyrir sig um umfang spillingar innan opinbera geirans. Danmörk skipar sem fyrr efsta sæti listans, það er spilling mælist minnst þar.

Ísland fær 72 stig í mælingunni nú, það er fyrir árið 2023, en fékk 74 í mælingunni 2022. Í tilkynningu frá TI á Íslandi segir að Ísland sé í hópi 23 landa sem fái sögulega slæma einkunn í ár. Þeirra á meðal séu einnig Holland, Svíþjóð og Bretland ásamt Íran, Rússlandi, Tadsíkistan og Venesúela. Alls hafi 28 lönd bætt mælingu sína á milli ára en 34 hafa fallið. 118 lönd standa í stað.

Danmörk skipar fyrsta sætið sjötta árið í röð yfir þau ríki þar sem spilling mælist minnst. Danmörk hlaut líkt og árið 2022, 90 stig í mælingunni í ár, en gefin eru stig frá 0 upp í 100 stig.

Sómalía skipar 180. og neðsta sæti listans, hlaut 11 stig, en þar fyrir ofan eru Venesúela, Sýrland og Suður-Súdan.

Efstu sæti listans (þar sem spilling mælist minnst):

• 1. Danmörk, 90 stig
• 2. Finnland, 87 stig
• 3. Nýja-Sjáland, 85 stig
• 4. Noregur, 84 stig
• 5. Singapúr, 83 stig
• 6.-7. Svíþjóð og Sviss, 82 stig
• 8. Holland, 79 stig
• 9.-10. Þýskaland og Lúxemborg, 78 stig
• 11. Írland, 77 stig
• 12.-13. Kanada og Eistland, 76 stig
• 14.-15. Ástralía og Hong Kong, 75 stig
• 16.-18. Belgía, Japan og Úrúgvæ, 73 stig
• 19. Ísland, 72 stig
• 20.-23. Austurríki, Frakkland, Seychelleyjar, Bretland, 71 stig.