For­maður Við­reisnar í Reykja­vík sakaður um fjár­drátt

Upp komst um málið á laugardag við yfirferð á ársreikningi fyrir árið 2025 en til stóð að leggja hann fram á aðalfundi Viðreisnar í Reykjavík sem fram fór um helgina. Því var frestað þegar misræmi uppgötvaðist í bókhaldi.

Svanborg Sigmarsdóttir, framkvæmdastjóri Viðreisnar, staðfestir að hinn grunaði hafi millifært fjórar til fimm milljónir króna yfir á persónulega reikninga á árunum 2024 til 2026. Hann hafi viðurkennt brotin og nú þegar endurgreitt meirihluta fjárhæðarinnar. Hann hafi svo skuldbundið sig til að endurgreiða þær rúmlega 1,7 milljónir króna sem eftir standa.

Samkvæmt heimildum fréttastofu er um að ræða Natan Kolbeinsson, þáverandi formann Viðreisnar í Reykjavík. Hann er einnig alþjóðafulltrúi Viðreisnar og varamaður í stjórn RÚV fyrir hönd flokksins. 

Natan hefur áður gerst sekur um fjárdrátt og var dæmdur í skilorðsbundið fangelsi árið 2017 fyrir að hafa dregið sér fé úr sjóðum Landssambands æskulýðsfélaga en hann var um tíma formaður og gjaldkeri sambandsins. 

Málið var kært til lögreglu í dag

Talið er að fjárdrátturinn hjá Viðreisn hafi byrjað árið 2024 en hann hafði endurgreitt fjármunina sem hann tók úr sjóðum Viðreisnar í Reykjavík það ár áður en fjárhagsárið rann út. Uppgötvaðist fjárdrátturinn því ekki við yfirferð á ársreikningi þess árs.

Svanborg segir málið afskaplega leiðinlegt og að stjórn Viðreisnar í Reykjavík hafi í gær ákveðið að kæra málið til lögreglu. Kæra hafi svo verið lögð fram í dag.

„Það kemur í ljós þegar verið er að setja upp ársreikninginn, við reglubundið eftirlit, að reikningarnir stemma ekki. Þá fórum við náttúrulega að skoða þetta nánar og þá kom í ljós að það var trúnaðarmaður innan þessa félags sem hafði dregið að sér fé,“ segir hún um atvik helgarinnar. Hann sé nú búinn að segja sig frá öllum trúnaðarstörfum fyrir Viðreisn.

Mögulega áður haft aðgang að öðrum reikningi

Svanborg bætir við að málið varði opinbert fé og frjáls framlög félagsmanna sem þurfi að fara vel með. Viðreisn fær fjárframlög frá Reykjavíkurborg líkt og önnur stjórnmálaöfl í borgarstjórn. 

Nýr formaður stjórnar Viðreisnar í Reykjavík var kjörinn á aðalfundi félagsins á sunnudag. Fundarmenn voru ekki upplýstir um hinn grunaða fjárdrátt þar sem enn átti eftir að upplýsa stjórnina um málið, að sögn Svanborgar. 

Hún viti ekki til þess að fyrirætlað sé að ráðast í athugun á öðrum reikningum Viðreisnar í kjölfar málsins. Ekki hafi vaknað grunur um frekara misferli.

„Hann hefur bara verið með prókúru á þessum reikningi, eftir því sem ég best veit.“ Svanborg segir að hann hafi þó mögulega áður verið með prókúru á einhverjum öðrum reikningi. Hún ítrekar að málið sé mjög leiðinlegt og sé núna komið í ferli hjá lögreglu. 

Fréttin hefur verið uppfærð. Ekki hefur náðst í Natan Kolbeinsson.