Inn­leiða staf­rænan ís­lensku­kennara hjá sveitar­fé­lögum

Þetta kemur fram í tilkynningu. Þar segir að fjölmörg önnur sveitarfélög séu einnig að hefja innleiðingu. Eins og fram hefur komið er dagur íslenskrar tungu í dag.

Í tilkynningunni kemur fram að Bara tala sé stafrænn íslenskukennari sem byggir á gervigreind og íslenskri máltækni. Um sé að ræða endalausn sem byggi á kjarna lausnum íslensku máltækni áætlunarinnar.

Þá sé boðið upp á starfstengt íslenskunám og grunnnámskeið í íslensku fyrir vinnustaði. Með notkun sjónrænna vísbendinga og mynda geti notendur auðveldlega bætt orðaforða sinn, hlustunarfærni og hagnýtt minni, sem gefur þegar fram í sækir aukið sjálfstraust þegar íslenska sé töluð.

„Í dag eru 23 prósent starfsfólks á íslenskum vinnumarkaði af erlendu bergi brotin. Þjóðfélagið hefur breyst mikið á síðustu tveimur áratugum og þörfin á hágæða stafrænni íslenskukennslu hefur aukist til muna,“ segir Jón Gunnar Þórðarson, framkvæmdastjóri Bara tala.

„Fyrirtæki og sveitarfélög hafa tekið kennslulausninni okkar vel og í dag hafa 18 fyrirtæki og 5 sveitarfélög innleitt lausnina okkar. Við fögnum innilega þessum stóra áfanga á degi íslenskrar tungu!“

„Þvert á atvinnugreinar telja vinnuveitendur sem Akademias þjónustar með rafrænum fræðslulausnum glerþak vera á vinnumarkaðinum. Þeir sem læra tungumálið eru þeir einstaklingar sem fá framgang í starfi, verða t.d. teymisstjórar og deildarstjórar, og uppskera með því hærri laun og betra líf í íslensku samfélagi. Án tungumálsins er því hætt við að stórir hópar festist í ákveðinni fátæktar gryfju,“ segir Guðmundur Arnar Guðmundsson, framkvæmdastjóri Akademias.

Ánægð í Mosfellsbæ og Ísafirði

„Hjá Mosfellsbæ starfar stór og öflugur hópur starfsfólks með annað móðurmál en íslensku. Við trúum því að Bara tala sé frábært tæki til að auðvelda starfsfólki okkar að ná valdi á íslenskunni og þannig komast hraðar og auðveldar inn í samfélagið,“ er haft eftir Kristjáni Þór Magnússyni, sviðsstjóra mannauðs og starfsumhverfis Mosfellsbæjar.

„Það er mjög mikilvægt að lækka þann þröskuld sem íslenskunámið er mörgu erlendu starfsfólki og því hlökkum við til samstarfsins við Bara tala, sem sannarlega býður upp á áhugaverða leið til að efla íslenskukunnáttu.“

Baldur Ingi Jónasson, mannauðsstjóri Ísafjarðarbæjar, segir bæinn vilja bjóða erlendu starfsfólki sínu upp á hinn nýa stafræna íslenskukennara. Sveitarfélagið telji mikilvægt að gefa starsfólkinu tækifæri til að efla íslenskukunnáttu í leik og starfi og styðavið máltileinkun þess.