Eðal­fang eignast meiri­hluta í 101 Sea­food

Í tilkynningu um kaupin segir að með þeim bætist 101 Seafood inn í samstæðu Eðalfangs, sem sé í grunninn tvö matvælafyrirtæki með áherslu á sjávarútveg. Annars vegar Eðalfiskur ehf. í Borgarnesi og hins vegar Norðanfiskur ehf. á Akranesi. 

Eðalfiskur sérhæfi sig í framleiðslu, sölu og dreifingu á ferskum, frystum, reyktum og gröfnum laxaafurðum, en Norðanfiskur sérhæfi sig í framleiðslu, sölu og dreifingu á úrvalssjávarfangi til veitinga- og stóreldhúsa á innanlandsmarkaði ásamt sölu sjávarfangs í neytendapakkningum í verslunum um land allt.

101 Seafood hafi tekist að skapa sér sérstöðu á markaði við innflutning og sölu sjávarafurða. Með góðum samböndum við trygga birgja hafi félagið orðið leiðandi í innflutningi á eftirsóttum skelfiski á borð við humar og hörpudisk.

Andri Gunnarsson, stjórnarformaður Eðalfangs, bindi miklar vonir við samrunann og segi áætlanir stjórnenda 101 Seafood falla vel að framtíðarsýn Eðalfangs. 

Kaupin og aukin samvinna félaganna komi því til með að styrkja rekstur Eðalfangssamstæðunnar. Félögin hafi átt í nánu samstarfi undanfarin ár og kaupin séu liður í enn frekari samvinnu þeirra til framtíðar.

Samkeppniseftirlitið hafi samþykkt viðskiptin fyrr á árinu en gengið endanlega frá kaupunum miðvikudaginn 4. október.