Niðurstöður úr krufningu ættu að liggja fyrir í dag

Þetta segir Grímur Grímsson, yfirlögregluþjónn á Miðlægri rannsóknardeild Lögreglunnar á höfuðborgarsvæðinu, í samtali við fréttastofu.

Gæsluvarðhaldsúrskurður yfir manninum rennur út á morgun. Hvort krafist verði áframhaldandi gæsluvarðhalds ræðst af niðurstöðum krufningar, að sögn Gríms.

Hann vill ekki ganga svo langt að tala um átök milli hins grunaða og þess látna. Það liggi aðeins fyrir að mannslátið hafi orðið vegna árásar. Engum vopnum var beitt við árásina.

Eins og greint var frá í gær átti árásin sér stað á skemmtistaðnum Lúx um klukkan fjögur á laugardagsnótt. Var maðurinn, sem var litháískur, fluttur á sjúkrahús og lést þar samdægurs.