Hæstánægður með stjörnuna og bauð stjörnukokkum upp á íslenskan rófurétt í Turku

Þráinn Freyr Vigfússon er nýkominn frá Turku, elstu borg Finnlands, þar sem matreiðslufólk í fremsta gæðaflokki fékk Michelinstjörnuna eftirsóttu. Þráinn er einn af eigendum veitingastaðanna Óx og Súmak sem standa við Laugarveg en Óx fékk í gær Michelin stjörnuna og þá mælir Michelin sérstaklega með veitingastaðnum Sumac sem þykir líka mikil áfangi í heimi matreiðslunnar.

„Þetta er náttúrulega í fyrsta skipti sem við erum að fara á hátíðina með stjörnuna þannig að það er gott að fá skilaboðin. Okkur var boðið út og þá þýddi það náttúrulega að við værum að halda henni [Michelinstjörnunni]. Auðvitað var það mjög sætt og líka mikill sigur að Sumac hélt líka sínum status sem einn af þeim stöðum sem Michelin mælir með. Það er mjög sætt að báðir staðirnir séu áfram í bókinni, eins og maður segir.

Þráni og matreiðslumönnum á Óx var boðið á athöfnina í Turku en matreiðslumenn nokkurra veitingastaða voru fengnir til að elda ofan í gestina og var Óx einn af þeim.

„Við vorum með íslenskan rófurétt sem við erum með á matseðlinum hjá okkur á Óx.“

Lengi vel var Óx í sama húsnæði og Sumac en Óx var fluttur í nýtt húsnæði hinum megin við götuna, Laugarveg 55, í nóvember síðastliðnum. Þegar Michelinstjörnu-veitingastaðir loka eiga þeir á hættu að missa stjörnuna sína en það var öðruvísi í tilviki Óx því staðurinn lokaði raunverulega aldrei, heldur var honum skellt í lás á laugardegi á gamla staðnum og opnað á nýjum stað á miðvikudegi.

„Þeir treystu því að við værum að gera þetta til að gera staðinn betri og til að gera meira upp úr upplifuninni að koma á Óx. Út frá því held ég að við höfum fengið hana í fyrra og það er gaman að nýja staðsetningin hafi haldið. Við bara stefnum á að gera betur, eins og alltaf og á hverjum degi,“ segir Þráinn einbeittur.

Heilt ferðalag að snæða á Óx

Þráinn lýsir upplifuninni að snæða á Óx sem ákveðnu ferðalagi. Gestir staðarins mæta við innganginn að Laugarvegi 55 og er hleypt inn eftir að bjöllu er hringt. 

„Þá gengur þú inn dimman gang og niður í garð og þaðan inn í stofu sem er í rauninni eins og að vera kominn aftur í tímann til ársins 1976. Þaðan er farið inn í annað rými og þá ertu kominn á Óx. Ég held að okkur hafi tekist að búa til umhverfi sem er eftirminnilegt fyrir alla sem koma til okkar en númer eitt, tvö og þrjú snýst þetta alltaf um matinn. Við erum alltaf að reyna að gera betur og búa til nýtt bragð sem mun lifa í minni gestanna.“