Jón Axel Guðmundsson var ekki í leikmannahópi Pesari frekar en í fyrri tveimur leikjum liðanna í einvíginu. Milan kom með 2-0 forystu í einvíginu inn í leik kvöldsins og gat því tryggt sér sæti í undanúrslitum með sigri. Pesaro lenti í áttunda sæti deildakeppninnar en Milan endaði í efsta sæti.
Leikurinn í kvöld var jafn og leiddi Milan með sex stigum í hálfleik, staðan þá 42-36 gestunum í vil. Í upphafi síðari hálfleiks hélst munurinn svipaður. Pesaro tókst að jafna metin í 53-53 um miðjan þriðja leikhluta en Milan náði forystunni á ný og leiddi 66-61 áður en fjórði leikhluti hófst.
Lið Pesaro kom síðan afar sterkt til leiks í lokafjórðungnum. Þeir skoruðu fyrstu sjö stigin og komust í forystu og náðu átta stiga forskoti í stöðunni 82-74 þegar tæpar þrjár mínútur voru eftir. Þann mun náði Milan ekki að brúa, Pesaro sigldi sigrinum í höfn og vann 88-83 sigur að lokum.
Staðan í einvíginu er því 2-1 en liðin mætast næst á laugardag á heimavelli Pesaro.
