Gagn­rýnd­i aðra bak­hjarl­a fyr­ir hæg­a­gang með skrið­drek­a

Pistorius sagði á fundinum í gær að árangurinn sem náðst hefði varðandi það að senda Úkraínumönnum skriðdreka hefði „ekki beint verið framúrskarandi, vægast sagt“.

Þá sagðist hann ekki skilja af hverju ríki sem hefðu þrýst hvað mest á Þjóðverja væru ekki enn búin að senda skriðdreka eða ætluðu ekki að gera það.

Sjá einnig: Morawiecki segir framgöngu Þjóðverja óafsakanlega

Samkvæmt frétt Financial Times sagði Pistorius að Úkraínumenn þyrftu nýlega skriðdreka og benti á Leopard 2A6 skriðdrekana. Þeir einu sem segjast ætla að gefa slíka skriðdreka eru Þjóðverjar og Portúgalar.

Auk skrið- og bryndreka segjast Úkraínumenn hafa mikla þörf fyrir skotfæri en hingað til hafa þeir notað meira af skotum en bakhjarlar Úkraínu geta framleitt. Áætlað er að Úkraínumenn hafi verið að skjóta um fimm þúsund sprengikúlum á dag að undanförnu. Rússar eru sagðir skjóta um fjórum sinnum fleiri skotum á degi hverjum.

Enn sem komið er hafa Bretar heitið því að afhenda Úkraínumönnum fjórtán Challenger 2 skriðdreka og verið að þjálfa úkraínska hermenn í notkun þeirra í Bretlandi. Pólverjar ætla að gefa fjórtán Leopard 2A4 skriðdreka og eru þeir einnig að þjálfa úkraínska hermenn. Þeir ætla einnig að gefa þrjátíu P-91 skriðdreka.

Þjóðverjar hafa heitið fjórtán Leopard 2A6 skriðdrekum og eru byrjaðir að þjálfa úkraínska hermenn á þá. Kanadamenn hafa heitið fjórum Leopard 2A4 og Portúgalar þremur Leopard 2A6. Þá hafa Norðmenn heitið átta Leopard 2A4 skriðdrekum og Spánverjar sex.

Mörg ríki Evrópu hafa þar að auki heitið því að senda Úkraínumönnum fjölmarga eldri skriðdreka af gerðinni Leopard 1A5. Enginn þessara skriðdreka er kominn til Úkraínu, svo vitað sé.

Bandaríkjamenn hafa einnig heitið því að útvega Úkraínumönnum 31 M1A1 Abrams skriðdreka en það er langt í að þeir verði afhentir.

Úkraínumenn eru einnig að fá mikið magn bryndreka frá Bandaríkjamönnum og Þjóðverjum fyrir væntanlegar gagnárásir í vor. Fjölmiðlar í Þýskalandi hafa birt myndir af þessum farartækjum eftir að þau voru flutt til landsins á dögunum.

FT hefur eftir Mariusz Blaszczak, varnarmálaráðherra Póllands, að skriðdrekasendingar til Úkraínu væru allar að koma til. Pólverjar ætluðu að einbeita sér að Leopard 2A4 skriðdrekum og að Þjóðverjar ættu að vinna með Leopard 2A6 útgáfurnar.

2A6 útgáfan er nýrri en 2A4 og meðal annars með stærri byssu.

Óttast stíflur í flutningskerfinu

Þrátt fyrir gagnrýni þýska ráðherrans hefur Washington Post eftir bandarískum embættismönnum að flæði hergagna til Úkraínu sé að aukast. Hætta sé á því að kerfið sem notað er að flytja þessi hergögn stíflist á næstunni.

Heimildarmenn WP segja flesta ekki átta sig á því hversu erfitt sé að koma þessum hergögnum til Úkraínu. Mikil leynd hefur hvílt yfir þessu sendingaferli og hingað til hefur Rússum ekki tekist að stöðva sendingar með árásum, svo vitað sé. Mark Milly, formaður herforingjaráðs Bandaríkjanna, sagði á blaðamannafundi í gær að Rússar hefðu reynt slíkar árásir.

Hergögnin flæða að mestu frá herstöðvum í Póllandi, Slóvakíu og Rúmeníu.

Þegar kemur að skrið- og bryndrekum er þó erfitt að flytja þá öðruvísi en á lestum eða stærðarinnar eftirvögnum sem erfitt er að dulbúa eða flytja í laumi. Til að flytja með lest þyrfti að safna saman mörgum sérhönnuðum lestarvögnum og sérfræðingar segja ólíklegt að slíkt myndi fara fram hjá Rússum. Þá myndi taka mikinn tíma og mikið eldsneyti að flytja öll farartækin með vörubílum.

Sjá einnig: Segja að vestrænir skriðdrekar brenni eins og aðrir

Vesturlönd hafa þó þegar, eins og áður hefur komið fram, sent töluvert magn sovéskra skriðdreka til Úkraínu og ekki er vitað til þess að Rússum hafi tekist að gera árás á slíkar sendingar.