Tón­listar­­menn opna sig í nýrri þátta­röð: „Menn voru „stone­d“ í mörg ár á hverjum einasta degi“

Tvö ár eru síðan fyrsta þáttaröð af Tónlistarmönnunum okkar var sýnd á Stöð 2. Sú þáttaröð naut mikilla vinsælda og því var ákveðið að endurtaka leikinn, enda nóg af frábæru tónlistarfólki hér á landi.

Viðmælendur í nýju þáttaröðinni eru þau Nanna Bryndís Hilmarsdóttir, Björgvin Halldórsson, Mugison, Sigga Beinteins, Andrea Gylfadóttir og Valdimar Guðmundsson.

„Við byrjuðum að taka þessa þáttaröð upp jólin 2021, þá fórum við á Jólagesti Björgvins. Það voru fyrstu tökurnar. Síðasti tökudagur var svo bara núna um daginn þegar við fórum aftur á Jólagesti. Við byrjuðum á Björgvin og enduðum á Björgvin,“ segir Auddi í samtali við Vísi.

Nanna Bryndís kom mest á óvart

Tökur stóðu því yfir í heilt ár og hitti Auddi viðmælendur sína reglulega yfir tímabilið sem Auddi telur að skapi dýpri tengingu við viðmælendur.

„Ég held það sé mjög mikill munur á því þegar fólk mætir einu sinni í eitt viðtal og að vera að hitta viðmælendur svona oft yfir langt tímabil eins og við erum að gera. Það er mjög lítið teymi í kringum þættina, þannig það myndast bara mjög þægileg og persónuleg stemning, frekar en að þetta sé hefðbundið viðtal.“

Nanna Bryndís, söngkona hljómsveitarinnar Of Monsters And Men er fyrsti viðmælandi þáttaraðarinnar. Auddi segir að Nanna sé jafnframt sá viðmælandi sem hafi komið hvað mest á óvart.

„Fólk veit ekkert mikið um hana Nönnu. Þeir sem hafa séð þann þátt uppi í vinnu, þeim fannst alveg geggjað að fá að kynnast henni.“

Björgvin Halldórsson opnar sig

Þó svo að flestir tónlistarmennirnir í þáttunum hafi farið í fjölmörg viðtöl í gegnum tíðina telur Auddi að áhorfendur fái að kynnast þeim í nýju ljósi.

„Við reynum að spyrja fólk út í hitt og þetta. Bjöggi opnar sig vel þarna í sínum þætti.“ En í stiklu fyrir þættina má heyra Björgvin rifja upp gamlar og góðar bransasögur.

„Og svo fóru efnin að koma - hassið,“ segir Björgvin í stiklunni. Auddi spyr hann þá hvort hann hafi verið að fá sér. „Já menn voru „stoned“ í mörg ár á hverjum einasta degi,“ svarar Björgvin.

Tónlistarmennirnir okkar verða á dagskrá á Stöð 2 á sunnudögum í vetur. Fyrsti þáttur verður sýndur 15. janúar og segir Auddi að áhorfendur eigi von á sannkallaðri veislu.