Sérstök tilfinning að sjá Úkraínu á sviðinu: „Þeir fara bara heim í stríð þegar þeir eru búnir að taka þátt“

Sautján lönd keppa í riðlinum í kvöld um tíu sæti í úrslitunum á laugardag en það eru Systur sem flytja lagið Með hækkandi sól fyrir hönd Íslands. Felix Bergsson, farastjóri íslenska hópsins, segir stemninguna góða í hópnum fyrir kvöldið en dómararennsli fór fram í gær.

„Við erum bara til í þetta, við lentum í smá tæknitrauma í gær en þetta lítur allt betur út núna,“ segir Felix en mistök voru gerð við hljóðblöndun út í sal auk þess sem systurnar heyrðu lítið í sjálfum sér.

„Ég sá þetta sjálfur á skjá og heyrði hljóðið eins og það fór til dómnefnda og þetta var mjög gott hjá þeim, flutningurinn var frábær. Það er bara svo óþægilegt þegar að þú heyrir ekki í sjálfum þér, þá ertu ekki alveg viss, en flutningurinn var frábær,“ segir hann enn fremur.

Felix segir að systurnar hafi skiljanlega verið stressaðar vegna þessa en það hafi ekki komið niður á flutningnum. Ísland er í baráttusæti samkvæmt helstu veðbönkum en hvort Ísland verði í tíunda umslaginu er ómögulegt að segja.

„Flutningurinn í kvöld er stóra málið og þá sjáum við bara hvað kemur upp úr kjörkössum, og hvort þeir setja okkur sem tíunda umslag eða hvort við verðum þarna yfirleitt, það verður bara að koma í ljós,“ segir Felix og hlær. „Þannig ég hvet bara fólk til að fylgjast með og gera gott partí úr þessu.“

Gæsahúð og tár yfir úkraínska flutningnum

Úkraínumennirnir í Kalush Orchestra stíga sömuleiðis á svið í kvöld en lagi þeirra, Stefania, er spáð sigri á laugardag. Stríðið í Úkraínu hefur nú staðið yfir í tvo og hálfan mánuð og óneitanlega sett svip á keppnina í ár.

„Það er mjög sérstök stemning í kringum það allt saman, það er búið að fréttast að þeir þurfa að fara aftur í stríðið um leið og þeir fara aftur heim. Þannig þeir fara ekkert að túra Evrópu eða svoleiðis, þeir fara bara heim í stríð þegar þeir eru búnir að taka þátt í Eurovision,“ segir Felix.

Hann segir sambandið milli úkraínska og íslenska hópsins mjög gott þar sem Úkraína finnur fyrir miklum stuðning. Það sé þó ekki aðeins samúðin sem spilar inni í það að þeim er spáð sigri en Felix segir atriði og lag Úkraínu mjög gott.

„Það er mjög tilfinningaríkt að sjá þá á sviðinu, mjög sérstök tilfinning, maður fær gæsahúð upp úr og niður úr og tárin í augun svolítið. Þannig þeir voru bara frábærir í gærkvöldi,“ segir Felix.