Jenni­fer Lopez og Ben Af­f­leck trú­lofuð

Frá þessu greina slúðurmiðlar vestanhafs og hafa eftir talsmanni Lopez, sem í daglegu tali er oft kölluð JLo.

Parið, sem af aðdáendum er oft kallað „Bennifer,“ er búið að vera saman frá því í maí á síðasta ári. Þetta er þó ekki í fyrsta skipti sem þau Affleck og Lopez trúlofa sig, en fyrir tæpum tveimur áratugum síðan fóru þau að vera saman. Það var í júlí 2002. Þau trúlofuðu sig í nóvember sama ár en héldu hvort í sína áttina í janúar 2004.

Í viðtali við PEOPLE í febrúar sagði Lopez að sambandi hennar við Affleck væri öðruvísi háttað nú heldur en þá.

„Við erum eldri, gáfaðri, reyndari, erum á öðrum stað í lífinu, eigum börn og þurfum að vera meðvituð um þessa hluti,“ sagði Lopez þá.