Icelandair flýgur í verk­efni á Suður­skauts­landinu

Í tilkynningu frá Icelandair segir að Boeing 757 þota á vegum félagsins hafi í byrjun vikunnar hafið þriggja mánaða verkefni sem feli í sér reglubundið flug á milli Punta Arenas í Síle og flugvallarins á Union Glacier á Suðurskautslandinu, fram í janúar á næsta ári.

Um fjögurra klukkustunda flug er á milli Punta Arenas og Union Glacier.

Flogið er með ferða-, göngu- og vísindamenn á vegum Antarctic Logistics & Expedition (ALE), en þrjár áhafnir Icelandair munu skipta verkefninu með sér.

Í hverri áhöfn eru þrír flugmenn, fjórar flugfreyjur og -þjónar og tveir flugvirkjar og verður hver áhöfn staðsett ytra í um fjórar vikur í senn.

Framundan eru einnig tvö flug á vegum Loftleiða frá Osló til Troll á Suðurskautslandinu. Þar verða vísindamenn fluttir til rannsóknarstöðvarinnar sem þar er rekin af Norsk Polar Institut og er staðsett á ströndinni sem kennd er við Mörtu, krónprinsessu Noregs. Áætlað er að þau flug fari fram í byrjun næsta mánaðar.

Flogið verður á Boeing 767 vél frá Icelandair og um 20 manna áhöfn Icelandair mun sinna fluginu. Icelandair sinnti sambærilegu verkefni í febrúar á þessu ári.

Árni Hermannsson, framkvæmdastjóri Loftleiða Icelandic, segir í tilkynningunni að fyrirtækið hafi um árabil sinnt fjölbreyttum verkefnum víða um heim og nýtt til þess flugvélar og starfsfólk frá Icelandair.

„Mikil reynsla er til staðar innan félagsins til að takast á við slík verkefni, hvort sem er horft er til áhafna, flugvirkja eða skrifstofufólks sem kemur að undirbúningi slíkra verkefna sem gjarnan eru umfangsmikil.“

Hann segir að gert sé ráð fyrir að flugvélar á vegum Loftleiða Icelandic komi við í öllum sjö heimsálfunum á næsta ári.

„Starfsmenn Loftleiða búa yfir öflugu tengslaneti og hafa getið af sér gott orðspor á alþjóðavettvangi. Með því að takast á þessi verkefni og fleiri sem falla til á vettvangi Loftleiða náum við að skapa félaginu aukinna tekna, nýta flugflota og áhafnir betur auk þess sem áhafnir félagsins öðlast mikla reynslu. Það er því mikill hagur af því fyrir Icelandair Group og dótturfélög að sinna verkefnum sem þessum.“