Oddvitaáskorunin: Dundaði sér við fjáraukalög í Covid

Willum Þór Þórsson leiðir lista Framsóknarflokksins í Suðvesturkjördæmi í kosningunum.

„Ég heiti Willum Þór Þórsson, 58 ára, fimm barna faðir og er oddviti Framsóknar í Suðvesturkjördæmi.

Ég er hagfræðingur, kennari og íþróttaþjálfari í grunninn og hef setið á alþingi í hátt í 8 ár.“

„Á þessu kjörtímabili sem senn er að ljúka hef ég sinnt ábyrgðarstörfum m.a. sem formaður fjárlaganefndar ásamt því að vera starfandi þingflokksformaður. Auk þess hef ég setið í efnahags- og viðskiptanefnd, allsherjar- og menntamálanefnd og forsætisnefnd. Kjörtímabilið hefur verið viðburðaríkt og óvenju krefjandi, held ég að sé óhætt að segja.

Næstu misseri verða mikilvæg í viðspyrnunni og miklar áskoranir m.a. á sviði efnahagsmála, ríkisfjármála og atvinnumála. Stór mál sem þarf að takast á við af ábyrgð, festu og skynsemi.

Ég trúi því að reynsla mín af þeim ábyrgðarstörfum sem mér hefur verið trúað fyrir komi að góðum notum við þær áskoranir sem framundan eru.“

Hver er fallegasti staðurinn á Íslandi?

Sólsetrið í vestri af svölunum hjá mér í Kópavoginum.

Hvað færðu þér í bragðaref?

Þristur, skógarberjamix og bláber.

Uppáhalds bók?

Fyrir utan Fjárlagafrumvarpið 😊 þá er það Aðventa eftir Gunnar Gunnarsson.

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

Dýrið gengur laust með Ríó Tríó.

Hvar á Íslandi myndir þú helst vilja búa? (Ekki í þínu kjördæmi)

Vestmannaeyjum.

Dundaðir þú þér við eitthvað á tímum Covid og samkomutakmarkana? Hámhorf eða nýtt áhugamál, sem dæmi.

Dundaði mér við fjáraukalög og bandorma svona meira og minna.

Hvað tekur þú í bekk?

118,5 kg.

Burstar þú tennurnar fyrir eða eftir morgunmat?

Allur gangur á því.

Draumastarfið? (Fyrir utan þingsetu)

Knattspyrnuþjálfun.

Hvað myndir þú segja við Kim Jong Un, einræðisherra Norður-Kóreu, ef þú myndir hitta hann í einrúmi?

Hyeobdong.

Uppáhalds tónlistarmaður?

Geri ekki upp á milli bræðrana Jóns og Frikki Dór. Þeir eru frábærir.

Besti fimmaurabrandarinn?

Veistu hvað sóttvarnarlæknirinn í Japan heitir? Taka Sýni.

Ein sterkasta minningin úr æsku?

Þegar ég byrjaði í KR.

Hver er fyrirmynd þín í pólitík?

Steingrímur Hermannsson af erlendum leiðtogum finnst mér mjög traustvekjandi ára yfir Angela Merkel.

Besta íslenska Eurovision-lagið?

Sókrates með Sverri Stormsker.

Besta frí sem þú hefur farið í?

Öll sumarfrín með fjölskyldunni.

Uppáhalds þynnkumatur?

Hlöllabáturinn hjá Simma Vill.

Hve oft hefur þú farið að sjá eldgosið?

Aldrei.

Uppáhalds Fóstbræðraatriði?

Indriði á stjórnarfundinum.

Uppáhalds uppátækið frá framhaldsskólaárunum?

...hvar á maður að byrja. Líklega best að sleppa því en árin í Verzlunarskólanum voru eitt stórt uppátæki.

Rómantískasta uppátækið?

Frú Ása er ein til frásagnar af því.