Páskaskrautið: Stærstu mistökin að ofhlaða

Elva býr ásamt strákunum sínum þremur í Kópavogi og sjálf segist hún ekki skreyta mikið heima fyrir.

„Ég legg samt sem áður mikla áherslu á matarborðið og held fast í þá hefð að útbúa girnilegan bröns á páskadag þar sem ég elska að nostra við útkomu borðsins. Það gleður einstaklega mikið að heyra viðbrögðin hjá þeim sem setjast til borðs og ég trúi því að við njótum matarins og samverunnar örlítið betur þegar borðið er fallega skreytt. Á páskunum vel ég ljósan pastellitaðan hördúk, kerti og umfram allt eru lifandi blóm á borðinu sem binda þetta allt saman.“

Hvernig skreytir þú hjá þér fyrir þessa páska?

„Ég vel að setja nokkrar greinar í vasa sem springa út en einnig fersk blóm sem gefa góðan angan og fylla heimilið af vori sem er rétt handan við hornið. Ég keypti til að mynda fölbleikar Oriental liljur og Valmúa þetta árið, ásamt öðrum litlum vöndum sem enda á matarborðinu og skreyta þannig borðhaldið alla páskahátíðina. Það er gaman að taka beygju frá hefðbundnum blómum enda er úrvalið glæsilegt í betri blómabúðum bæjarins.“

Heldur þú að það geti verið að fólk mikli það fyrir sér að skreyta? 

“Já og nei – ég held að það séu margir sem sleppa því alfarið að punta hjá sér fyrir páskana á meðan aðrir fara alla leið. Fólk er meira afslappað á þessum tíma í samanburði við jólin, þannig á það að vera – ekkert stress, bara eintóm notalegheit, málshættir og samvera.“

Hver finnst þér persónulega vera helstu mistökin hjá fólki þegar það skreytir? 

„Að ofhlaða. Sumir eru gjarnir á að ofhlaða allskyns skrauti og dreifa þá skrautinu um allt hús í stað þess að grúppa það betur saman. Það getur verið fallegt að nota bakka og raða á hann skrauti og jafnvel kertum þar sem uppstillingin myndar ákveðna stemningu og má þá flytja á milli staða eftir þörfum.“

Getur þú gefið nokkrar hugmyndir varðandi páskaskreytingar? 

„Það má leika sér á ótal vegu til dæmis með tauservíettur – búa til lítil eyru eða binda þær upp með ólíkum hnútum og leggja jafnvel blóm þar á. Setja blóm í nokkra misháa vasa til að hafa á borði ásamt litlum skálum með sætum syndum til að narta í. Klassískt er að mála á egg og hengja upp á greinar, en það má líka fara í skógarbað með fjölskyldunni og ná sér í leiðinni í nokkrar stærri greinar til að hengja upp yfir matarborðið eða út í glugga – það kemur mjög skemmtilega út.“

Er eitthvað sérstakt sem er í tísku núna þegar kemur að páskaskreytingum?

„Greinar, blóm og lítil egg í öllum stærðum og gerðum – allt frá hangandi á grein yfir í lítil súkkulaðiegg sem prýða eftirréttinn. Eins eru pastellituð snúningskerti vinsæl þessi dægrin og má finna í fjölda verslana. Og ekki má gleyma marengsbombum! Marengs telst kannski ekki sem „tískuvara“, en er engu að síður vinsæll á páskum því hann má skreyta á marga ólíka vegu sem og baka í minni útgáfum og þá hugsuð sem lítil hreiður.“

Færðu þér sjálf páskaegg? 

„Einfalda svarið er „já“ – en flókna svarið er að ég fæ gríðarlegan valkvíða á hverju ári með val á eggi. Ég væri helst til í miniature af öllum eggjum til að geta smakkað þau sem flest. Annars er ég búin að háma í mig ógrynni af páskalakkrísinum frá Johan Bülow, sem kallast Banana Twist en ég verð óstöðvandi þegar lakkrísinn lendir fyrir framan mig.“