Frumkvöðlasjósund, hönnunarkeppni gervifóta og íslenskt wasabi

Er hátíðinni ætlað að vekja athygli á nýsköpun sem á sér stað innan stofnana, fyrirtækja og sprotafyrirtækja þar sem framúrstefnulegar lausnir, ólík sköpunarferli og kraftmiklir frumkvöðlar fá notið sín. Þetta kemur fram í tilkynningu frá Nýsköpunarviku en fyrstu viðburðir hátíðarinnar voru kynntir í dag.

Vilja vera markaðsgluggi út í heim

Að sögn skipuleggjenda er Nýsköpunarvikan hugsuð sem vettvangur fyrir innlenda jafnt sem erlenda aðila til að kynnast nýsköpun á Íslandi, tengjast sprotum, fjárfestum og frumkvöðlum og mynda ný viðskiptasambönd og tengsl. Hún var haldin í fyrsta skipti í fyrra. 

„Okkar tilfinning er sú að það sé tiltölulega einfalt að stofna fyrirtæki hér á landi, en vandi flestra snýr að því að skala og vaxa út fyrir landsteinanna. Við vildum leggja okkar af mörkum og þess vegna stofnuðum við Nýsköpunarvikuna sem á að vera þessi markaðsgluggi út í heim. Nú er hægt að beina frumkvöðlum, fjárfestum og öðrum áhugasömum um íslenska nýsköpun á hátíðina þar sem hægt er að sjá og upplifa þverskurðinn af öllu því sem er í gangi,“ segir Melkorka Sigríður Magnúsdóttir, ein af stofnendum Nýsköpunarviku, í tilkynningu.

Eftirtaldir viðburðir voru kynntir í dag og verða hluti af dagskrá hátíðarinnar:

• Setning Nýsköpunarvikunnar í Grósku
• Feed the Viking: Frumkvöðlasjósund - Tánum dýft í Atlantshafið
• Flóra útgáfa: Getur samfélagsdrifin nýsköpun skilað hagnaði?
• Háskóli Íslands: Skyndikynni af sprotafyrirtækjum HÍ
• Háskóli Íslands: Nýsköpun í sjávarútvegi – gönguferð við Reykjavíkurhöfn
• Mannvit: Opinn fyrirlestur um sjálfbærni og Nýsköpun í verkfræðigeiranum
• Össur: Life without limitations - Breakthrough innovation for elderly amputees
• Matarboðið: Tempeh pop up á Von Mathús með Vegangerðinni
• Nýsköpunarskál - Árshátíð Nýsköpunar á Íslandi
• Aranja: Tæknifrumkvöðlar deila reynslusögum
• Nordic Wasabi: heimsókn í nýjar höfuðstöðvar og saga fyrirtækisins kynnt
• Hönnunarkeppni Össur og Listaháskóla Íslands - Hönnuðir framtíðarinnar hanna fótaskel á gervifætur
• Nýsköpunarsjóður atvinnulífsins: Mannauðsmál, liðsheild, teymi, ráðningar og fyrirtækjamenning sprotafyrirtækja
• Nýsköpunarsjóður atvinnulífsins: Verðmat sprotafyrirtækja, áhugaverð erindi og pallborðsumræður

Að sögn skipuleggjenda verður Nýsköpunarvikan blanda af viðburðum sem fara fram í eigin persónu og í streymi. Hún verður því ekki einskorðuð við eitt húsnæði eða ráðstefnusal heldur fer fram út um land allt.

Meðal þeirra aðila sem taka þátt í ár eru SaltPay, Össur, Marel, CCP, Háskóli Íslands, Íslandsbanki, Jökulá, Brim, Rannís, Vísindagarðar, Nýsköpunarsjóður atvinnulífsins, Frumtak, Icelandair, Reykjavíkurborg, Mjólkursamsalan, Nordic Wasabi, Rata, Aranja, Flóra útgáfa, Feed the Viking, Vegangerðin, Saltverk, Digido, Hugverkastofa, Samtök sveitarfélaga á Norðurlandi vestra, Samtök sveitarfélaga á Norðurlandi eystra auk atvinnuvega- og nýsköpunarráðuneytisins.