Vonast enn eftir kraftaverki á K2

Tvær herþyrlur lögðu af stað til leitar á K2 í morgun en engin ummerki fundust um þremenningana. Leitað var í allt að sjö þúsund metra hæð en skyggni var lélegt og fjallstoppurinn, sem er í rúmlega átta þúsund metra hæð, hulinn skýjum.

Fjölskylda Johns Snorra sagðist í yfirlýsingu í dag vonlítil um að John Snorri og samferðamenn hans væru á lífi. Hugur fjölskyldunnar væri hjá þremenningunum og þá færði hún pakistönskum og íslenskum stjórnvöldum kærar þakkir fyrir aðstoð við leitina.

Framhaldið skýrist í kvöld

Ashgar Ali Porik er eigandi ferðaskrifstofunnar Jasmine Tours, sem skipulagði leiðangur John Snorra og samferðamanna hans Ali Sadpara og Sajid Sadpara, og er jafnframt einn skipuleggjenda leitarinnar að þremenningunum.

Myrkur er nú skollið á í Pakistan og leit hætt í dag. Ashgar segir í samtali við fréttastofu nú síðdegis að íslenskum tíma að enn sé ekki komið á hreint hvort þyrlur verði boðaðar til leitar á ný á morgun.

„Við erum enn í sambandi við stjórnvöld og ef það verður leit þá láta þau okkur vita í kvöld, kannski eftir tvo, þrjá klukkutíma,“ segir Ashgar.

Viðkunnanlegur og hógvær maður

Ashgar kom John Snorra í samband við Ali og Sajid en sá fyrrnefndi er einn farsælasti fjallagarpur Pakistan.

„Við áttum í löngum viðræðum, um fimm til sex mánaða löngum, og svo kom hann [John Snorri] loks. Hann var mjög viðkunnanlegur og hógvær maður og ég ber virðingu fyrir honum,“ segir Ashgar í samtali við fréttastofu.

„[John Snorri] var mjög spenntur og til í slaginn vegna þess að þegar hann kom í fyrra fékk hann ekki góða þjónustu,“ segir Ashgar.

Vonast eftir kraftaverki

Ali Sadpara á langan feril að baki á fjöllum. Hann var í leiðangrinum sem náði fyrst á topp fjallsins Nanga Parbat í Pakistan að vetri til og þá hefur hann klifið átta af þeim fjórtán tindum heims sem eru hærri en átta þúsund metrar. Ashgar segir hann þann allra besta í faginu í Pakistan.

„Þetta er mjög erfitt fyrir alla í Pakistan og ég hef ekkert getað sofið síðustu tvo daga eftir að þetta gerðist. Við erum að reyna okkar besta, ríkisstjórnin er að hjálpa okkur eins og hún getur. Forsætisráðherrann hringdi í okkur. Þannig að allir hafa tekið þátt. Ég hef aldrei á ævinni tekið þátt í svona löngum björgunarleiðangri. Við erum enn vongóð og vonumst eftir kraftaverki, að við finnum hann á lífi,“ segir Ashgar.

Hann segir alla nema leitarteymið hafa yfirgefið grunnbúðirnar á K2. Sjerparnir sem þar voru hafi haldið heim í dag.

„Þrír starfsmenn mínir eru enn í grunnbúðunum og eru að bíða eftir kraftaverki. Við munum ekki loka grunnbúðum okkar í fimm, sex daga. Við munum bíða eftir því að hann birtist.“

Frændur bjóða fram krafta sína

Elia Saikaly, kanadískur kvikmyndagerðarmaður sem unnið hefur að kvikmynd um leiðangur Ali og John Snorra – og hefur jafnframt tekið þátt í leitinni, sagði frá því á Instagram-reikningi sínum í dag að frændur Ali, Imtiaz Hussain og Akbar Ali, hefðu einnig boðið fram krafta sína.

Þeir hafi hjálpað Sajid Sadpara, fjallagarpi og syni Ali, niður fjallið eftir að hann þurfti frá að hverfa frá leiðangrinum aðfaranótt föstudags eftir að hafa lent í vandræðum með súrefniskút. Sajid sagði í yfirlýsingu um helgina að hann teldi að faðir sinn og John Snorri hefðu lent í slysi á leiðinni niður fjallið.

Ashgar segir að hann hafi beðið þá Imtiaz og Ali að koma niður í grunnbúðirnar í dag en Saikaly sagði í færslu sinni að þeir hygðust halda áfram upp fjallið í von um að finna ummerki um þremenningana sem leitað er. Ashgar segir leit úr lofti mikilvægasta; hægt sé að senda göngumenn upp fjallið ef vísbendingar finnist úr lofti.

„Þetta er stórt fjall og hættulegur leiðangur. Svo við vildum ekki leggja fleiri líf í hættu,“ segir Ashgar.