„Til hvers að bíða með svona erfiða ákvörðun?“

„Við gátum ekki tekið ákvörðun út frá því hvernig staðan væri núna, og hvaða félög ættu í hlut. Við tókum það allt út af borðinu. Við skoðuðum bara hvernig væri best að gera hlutina á þessum tímapunkti,“ segir Hannes S. Jónsson, formaður KKÍ, um það með hvaða hætti körfuboltatímabilinu var slitið á dögunum.

Deildarmeistarar voru krýndir í Domino‘s-deildum karla og kvenna, en engir Íslandsmeistarar verða krýndir á þessu ári. Fjölnir féll úr Domino‘s-deild karla og Grindavík úr Domino‘s-deild kvenna, en Grindavíkurkonur áttu enn von um að halda sér uppi þegar tímabilinu var slitið vegna kórónuveirunnar.

Í Sportinu í dag var Hannes spurður hvort að ekki hefði verið rétt að bíða með að taka ákvarðanir um það hvaða lið féllu, hvaða lið færu upp og hvort deildar- og Íslandsmeistarar yrðu krýndir. Hvort ekki hefði verið nóg að sinni að ljúka tímabilinu?

„Nei, ég held ekki. Alveg sama hvaða ákvörðun hefði verið tekin, hvort sem það var þessi eða einhver önnur, þá getur maður ekki sagt til um þetta. Ég spyr mig enn þann dag í dag; var þetta rétt eða rangt? Og ég held að ég myndi gera það líka ef ég tæki þessa ákvörðun eftir 3 vikur eða 4 vikur. Til hvers að bíða með svona erfiða ákvörðun? Stundum þarf maður að taka ákvarðanir þó að þær séu erfiðar. Stundum er ekkert betra að bíða með þær. Það er alltaf hægt að skoða allar ákvarðanir einhvern tímann seinna meir en ég held að við hefðum ekkert endilega komist að einhverri annarri niðurstöðu eftir 4-5 vikur. Við sjáum það þar sem að menn eru að taka þessar ákvarðanir seinna meir að það gerir þetta erfiðara í vöfum. Ég tek sem dæmi af félögum mínum af Norðurlöndunum sem ég er í miklu sambandi við, þeir segja sumir að þeir hefðu viljað gera þetta svipað og við, bara klára þetta strax alls staðar,“ sagði Hannes.

„Ég held að í þessu tilfelli hafi verið betra að taka af allan vafa strax,“ bætti hann við. Þjálfari karlaliðs Hamars hefur gagnrýnt það harðlega hvernig tekið var á málum varðandi það hvaða lið féllu úr efstu deild og hvaða lið færu upp úr 1. deild. Hamar og Höttur áttu fyrir höndum leik sem útlit var fyrir að réði úrslitum um hvort liðanna yrði efst í 1. deild, en Höttur var ofar þegar mótinu var slitið.

„Þar fórum við yfir regluverkið, fyrst að þetta kláraðist ekki inni á vellinum. Það var ekki til regla hjá okkur eða öðrum sérsamböndum ÍSÍ, eða á Norðurlöndunum. Ég talaði við marga hjá FIBA líka, og þessi regla er ekki til. Þá fórum við bara að skoða hvernig reglan ætti að vera ef að tímabili er slitið eins og þurfti að gera núna. Þá ákváðum við að það yrðu krýndir deildarmeistarar, neðstu liðin féllu, eitt lið í hvorri deild, og síðan færi þá eitt lið upp. Að sama skapi ákváðum við að krýna ekki Íslandsmeistara, vegna þess að þá þarf að fara í gegnum úrslitakeppni. Í meistaraflokkunum eru mismunandi reglur eftir deildum, og við ákváðum að það væri sama regla yfir allar deildir,“ sagði Hannes.