Einstakar og einhleypar um jólin

Árið 2020 er líklega erfiðasta ár einhleypra í sögunni.

Lífið hefur því tekið saman lista yfir eftirsóttar einhleypar konur hér á landi. Sérstök nefnd Vísis var skipuð til að velja eftirsóttustu konur landsins og má sjá yfirferðina hér að neðan.

Ellen Loftsdóttir er vafalítið ein af best klæddu konum landsins. Hún starfar sem listrænn stjórnandi og stílisti og hún er þekkt fyrir fágaðan og stílhreinan smekk.

Marín Þórsdóttir er með MBA gráðu frá HÍ og starfar sem deildarstjóri Rauða krossins á höfuðborgarsvæðinu. Hún er með mörg járn í eldinum, fer reglulega í sjósund, stundar fjallgöngur og hefur gefið út og komið að útgáfu nokkurra hannyrðabóka. Þá rak hún Kaffi Vest í nokkur ár. Marín er mikill fagurkeri, með eindæmum skemmtileg og elskar frönsk rauðvín.

Lögmaðurinn og pistlahöfundurinn Arna Pálsdóttir þykir með efnilegri konum landsins, en hún hefur hlotið mikla athygli fyrir pistlaskrif sín á Vísi. Arna er nafntoguð innan tryggingageirans fyrir bæði gáfur og útlit. Arna þykir einstaklega hnyttin og skemmtileg og elskar útivist og hreyfingu.

Þórdís Valsdóttir hefur slegið rækilega í gegn sem útvarpskona í Reykjavík síðdegis á Bylgjunni undanfarna mánuði. Hún elskar hreyfingu og útivist og þykir með eindæmum hress og skemmtileg. Þórdís á tvær stúlkur úr fyrra sambandi.

Bryndís Alexandersdóttir er verkfræðingur, ofurkona og ævintýrakona. Hún er mikill ferðalangur og setur það ekki fyrir sig að hoppa ein í ævintýraferðir og kanna heiminn. Hún kom að stofnun Móðurskipsins og sér um fjármál og rekstur hjá Íslenska fyrirtækinu Avo.

Katrín Amni Friðriksdóttir er hagfræðingur og vítamíndrottning Íslands. Hún er annar eigandi íslenska vítamínfyrirtækisins Iceherbs og sjálf þróar hún bætiefni og heilsuvörur fyrir merkið. Katrín lauk meistaranámi frá Domus Academi í Mílan þar sem hún fékk gráðu í luxury management eða lúxusstjórnun. Hún er hefur mikinn áhuga á heilsu og segja sögur að hún sé einstaklega mikill húmoristi og ævintýrakona.

Katrín Tanja Davíðsdóttir er ein stærsta stjarnan í heiminum í Crossfit heiminum. Hún er ótrúlega farsæl í sínu fagi og geislar ávallt í keppni. Katrín er stórglæsileg og elskar íþróttina en einnig samverustundir með vinum og fjölskyldu.

Linda Pétursdóttir er einhver allra glæsilegasta kona landsins og hefur verið það í áratugi. Hún er einhleyp en Linda var valin Miss World árið 1988. Linda P hugsar vel um heilsuna og elskar að eyða tíma með dóttur sinni. Linda er meðal annars með gráðu í heimspeki, hagfræði og stjórnmálafræði.

Ragnheiður Sara Sigmundsdóttir er önnur Crossfit-stjarna sem er að gera stórkostlega hluti á því sviði. Hún er til að mynda með 1,8 milljónir fylgjenda á Instagram. Eins og Katrín Tanja.

Sara er stórglæsileg og hress og skemmtileg. Hún hefur náð langt í Crossfit og stefnir á toppinn.

Saga Sig er einn besti ljósmyndari landsins og hefur verið það í þó nokkur ár. Saga er mikill listamaður og mjög sjarmerandi kona. Hún var ein af þeim fyrstu sem nefndin skilaði inn á lista.

Ásdís Rán, ísdrottningin sjálf, er búsett í Búdapest og hefur verið ein glæsilegasta kona landsins í mörg ár. Hún er sterk og hefur ávallt farið sínar eigin leiðir.

Elín Metta Jensen er ein besta knattspyrnukona landsins. Hún er landsliðskona og var í íslenska liðinu sem tryggði sér á lokamót Evrópukeppninnar sem fram fer árið 2022. Elín Metta er í læknisfræði.

Kolbrún Bergþórsdóttir, blaðamaður á Fréttablaðinu, og einn virtasti bókmenntarýnir landsins er einhleyp. Einstaklega flott kona sem er fær í sínu fagi. Kolbrún er mjög virt innan bókmenntageirans hér á landi og kemur reglulega fram sem gagnrýnandi í Kiljunni með Agli Helgasyni.

Kristborg Bóel Steindórsdóttir er 44 ára fjögurra barna móðir sem hefur unnið lengi sem fjölmiðlakona. Hún er einstaklega fjörugur persónuleiki og alltaf mikið fjör í kringum hana.