Innlent

Þurfa að vinna rösklega í vetur á Dynjandisheiði

Kristján Már Unnarsson skrifar
Pétur Hemmingsen, verkefnisstjóri ÍAV á Dynjandisheiði.
Pétur Hemmingsen, verkefnisstjóri ÍAV á Dynjandisheiði. Egill Aðalsteinsson

Framkvæmdir eru komnar á fullt við fyrsta áfanga nýs þjóðvegar yfir Dynjandisheiði. Fyrstu tíu kílómetrarnir eiga að vera tilbúnir með malbiki innan ellefu mánaða. Myndir frá sprengingum á verkstað mátti sjá í fréttum Stöðvar 2.

Byrjað var á nýja veginum í brekkunni fyrir ofan Vegagerðarkarlinn eða Pennukarlinn, sem reistur var af brúarsmiðum árið 1958 við ána Pennu. Egill Aðalsteinsson

Íslenskir aðalverktakar hófu verkið í Penningsdal ofan Flókalundar fyrir miðjan október. Á þeirra vegum vinna fimmtán starfsmenn á svæðinu undir stjórn Péturs Hemmingsen verkefnisstjóra, sem segir að gengið hafi þokkalega til þessa.

„Stærsti verkþátturinn í þessu verki eru sprengingar. Við erum bara á fullu í því núna,“ segir Pétur.

Sprengt fyrir nýja veginum í Pennusneiðingi. Horft niður til Vatnsfjarðar.Egill Aðalsteinsson

Bara í Penningsdalnum er áætlað að sprengja þurfi 220 þúsund rúmmetra. Unnið er tólf tíma á dag, frá sjö á morgnana til sjö á kvöldin, og það þarf að vinna rösklega.

„Já, mjög. Og það er eiginlega aðaláskorunin í þessu verki. Það er verktíminn. Við eigum að klára hérna næsta haust. Þannig að: Já, þetta verður svona spretthlaup.“

Framkvæmdir eru einnig hafnar uppi á heiðinni, á Þverdal neðan gatnamóta Bíldudalsvegar. 

Séð niður Þverdal í átt til Breiðafjarðar. Hægra megin fyrir miðri mynd má sjá tæki ÍAV í nýja vegstæðinu.Egill Aðalsteinsson

Fyrsti áfanginn er tvískiptur. Kaflinn að sunnanverðu er 5,7 kílómetrar en einnig er 4,3 kílómetra kafli milli Dynjandisvogar og Borgarfjarðar í Arnarfirði, um Meðalnes. Verktakarnar einbeita sér fyrstu mánuðina að verkinu Vatnsfjarðarmegin.

„Og einhverntímann eftir áramótin förum við að vinna í Arnarfirðinum líka,“ segir Pétur.

Horft út Dynjandisvog. Vegurinn fyrir Meðalnes færist úr hlíðinni niður í fjöruna.Egill Aðalsteinsson

Verksamningur þessa fyrsta áfanga er upp á 1.733 milljónir króna.

„Ég held að þetta verði mikil bylting fyrir fólkið hérna og aðra sem eiga leið um. Ekki spurning,“ segir verkefnisstjóri ÍAV.

Ef allt gengur að óskum verður það 30. september á næsta ári sem menn geta ekið eftir rennisléttu malbikinu.

Hér má sjá frétt Stöðvar 2:

Samgöngur Umferðaröryggi Ísafjarðarbær Vesturbyggð Dýrafjarðargöng

Tengdar fréttir

Flautuðu af gleði þegar þeir prófuðu göngin í fyrsta sinn

Vestfirðingar flautuðu úr bílum sínum af gleði þegar Sigurður Ingi Jóhannsson samgönguráðherra gaf fyrirmæli um að lyfta skyldi slánni við gangamunna Dýrafjarðarganga. Þegar þeir svo óku í gegn flautuðu þeir ennþá meira.

Geta séð fossinn Dynjanda í fyrsta sinn í klakaböndum

Ísfirðingar og aðrir íbúar á norðanverðum Vestfjörðum, sem óku um Dýrafjarðargöng í gær, uppgötvuðu margir óvænt nýjan möguleika sem jarðgöngin skapa. Í fyrsta sinn verður mögulegt að aka um þjóðvegakerfið að fossinum Dynjanda um hávetur auk þess sem leiðin hefur styst verulega.

Fyrstu kaflarnir kláraðir á einu ári á Dynjandisheiði

Vegagerðin hefur boðið út tvo fyrstu kaflana í endurnýjun vegarins um Dynjandisheiði, samtals um tíu kílómetra langa. Góð sátt virðist ríkja um þessa áfanga og er ekki vitað til þess að neinn hafi lýst andstöðu við þær veglínur sem núna eru boðnar út.

Svona gæti nýr vegur um Dynjandisheiði litið út

Vegagerðin hefur lagt fram frummatsskýrslu um mat á umhverfisáhrifum Vestfjarðavegar um Dynjandisheiði. Vegagerð við fossinn Dynjanda og um friðlandið í Vatnsfirði eru taldir viðkvæmustu þættir verksins.

Mest lesið


Fleiri fréttir

Sjá meira


×

Mest lesið